4 жніўня, Мінск /Кар. БЕЛТА/. Старшыня Камітэта дзяржаўнага кантролю Іван Тэртэль назначаны ўпаўнаважаным прадстаўніком кіраўніка дзяржавы ў Віцебскай вобласці. Адпаведнае распараджэнне сёння падпісаў Прэзідэнт Беларусі Аляксандр Лукашэнка, паведамілі БЕЛТА ў прэс-службе беларускага лідара.
Назначэнне Івана Тэртэля на пасаду ўпаўнаважанага прадстаўніка кіраўніка дзяржавы ў Віцебскай вобласці абмяркоўвалася ў час рабочай сустрэчы Прэзідэнта з кіраўніком КДК 29 ліпеня. "У нас кіраўнік КДК заўсёды адказваў за Віцебскую вобласць, ну і лес (лясная галіна. - Заўвага БЕЛТА) у яго быў. Думаю, гэта вам усё блізка, - адзначаў Прэзідэнт. - Таму я хацеў бы, каб вы паехалі ў Віцебскую вобласць, разабраліся там у сітуацыі і былі ўпаўнаважаным Прэзідэнта па гэтым рэгіёне".
"Я ведаю, вы, займаючыся ў Камітэце дзяржбяспекі пытаннямі паставак нафты і іншым, часта бывалі ў Наваполацку, ведаеце Віцебскую вобласць. Прынамсі, мне многія пра гэта гавораць. Разберацеся. Але я вельмі спадзяюся, што ваша работа будзе эфектыўнай не толькі на пасадзе старшыні камітэта, але і ўпаўнаважанага кіраўніка дзяржавы ў Віцебскай вобласці", - дадаў беларускі лідар.-0-