16 мая, Масква /Кар. БЕЛТА/. Двухбаковая сустрэча прэзідэнтаў Беларусі і Расіі прайшла ў Крамлі, перадае карэспандэнт БЕЛТА.
Кіраўнікі дзяржаў адправіліся на перагаворы пасля правядзення юбілейнага саміту АДКБ. "На перагаворы лідары прыехалі разам!" - паведаміў Telegram-канал "Пул Першага".
Сустрэча прэзідэнтаў прайшла ў кабінеце расійскага лідара. Але, згодна з іх рашэннем, без пратакольнай здымкі. "Злабадзённыя пытанні абмяркоўваюць за закрытымі дзвярыма", - дадалі ў "Пул Першага".
Як стала вядома па выніках перагавораў, кіраўнікі дзяржаў сам-насам абмеркавалі некалькі комплексаў пытанняў, а таксама дамовіліся аб поўнафарматнай сустрэчы ў бліжэйшы час.
Раней у прэс-службе беларускага лідара паведамілі, што адной з галоўных тэм размовы стануць пытанні развіцця кааперацыі і сумесная работа над імпартазамяшчэннем.
Парадак дня сустрэчы з расійскім калегам Аляксандр Лукашэнка прыадкрыў яшчэ 12 мая ў час сустрэчы з паслом Расіі Барысам Грызловым. Прэзідэнт Беларусі падкрэсліў, што пытанне імпартазамяшчэння сёння адно з важнейшых у супрацоўніцтве з Расіяй.
"Увесь час у нашых адносінах, вы гэта добра ведаеце не горш за мяне, нафта, газ, гандаль, пастаўкі, рынак і гэтак далей. Як я часта адзначаю, не было шчасця - няшчасце дапамагло, усё ж і гэтыя пытанні ў нас вырашаюцца. Але не гэта, напэўна, галоўнае для нас цяпер у адносінах. Я так абдумваю гэтыя праблемы, пры сустрэчы з Прэзідэнтам Расіі мы будзем сур'ёзна яшчэ раз абмяркоўваць, імпартазамяшчэнне - гэта пытанне вельмі важнае. Шмат кампетэнцый і ў Беларусі, і ў Расіі. Ну, яны з-за пэўных прычын не развіваліся так, як трэба. Дзякуй богу, што гэтыя кампетэнцыі існуюць, - сказаў кіраўнік дзяржавы. - Кааперацыя і імпартазамяшчэнне - гэта тыя шляхі, па якіх мы павінны сёння рухацца".-0-
