10 лютага, Мінск /Кар. БЕЛТА/. Прэзідэнт Беларусі Аляксандр Лукашэнка на нарадзе па пытаннях цэнаўтварэння чарговы раз звярнуў увагу на разрыў узроўню зарплат у радавых работнікаў гандлёвых сетак і кіраўніцтва гэтых кампаній, перадае карэспандэнт БЕЛТА.
На гэту праблему кіраўнік дзяржавы звяртаў увагу яшчэ ў кастрычніку 2022 года, калі даручаў у маштабах краіны выпрацаваць эфектыўную сістэму рэгулявання цэн. Цяпер жа ён пацікавіўся, як ідуць справы ў гэтым зарплатным пытанні. Звяртаючыся да прадстаўнікоў СМІ, кіраўнік дзяржавы сказаў: "Вы, калі ласка, Камітэт дзяржкантролю і ўрад узварухніце так, каб яны вам назвалі ўсе факты, дзе ў 30-40 разоў "вялікія" дзеячы, кіраўнікі атрымліваюць зарплату вышэйшую, чым звычайны прадавец і іншыя. А потым бегаюць па сетках і крычаць: "Ах, Прэзідэнт задушыў!" Бунт паднімаюць. Хочуць гэтых няшчасных прыпадняць і зноў учыніць нейкую бучу".
"Але вопыт у мяне ёсць, як з гэтай бучай разбірацца. І будуць разборкі строгія. Таму да людзей - прадаўцоў - трэба давесці: вось 800 або 1 тыс. рублёў ваша зарплата, а вось 50-60 тысяч зарплата ў гэтых так званых уладальнікаў", - дадаў беларускі лідар.
Зыходзячы з інфармацыі гандлёвых сетак, урад далажыў Прэзідэнту, што ў большасці арганізацый гандлю суадносіны зарплат работнікаў і кіруючага складу больш-менш выконваюцца. Кіраўнік дзяржавы яшчэ раз звярнуў увагу, што суадносіны зарплат работніка і кіраўніка, уладальніка гандлёвай арганізацыі павінны быць у межах 1 і 8. "Аднак у асобных гандлёвых сетках гэта патрабаванне не выконваецца. Напрыклад, "БелВілесдэн" (сетка "ГІПА". - Заўвага БЕЛТА), каэфіцыент склаў аж 67, - прывёў шэраг фактаў Прэзідэнт. - "Еўрагандаль" - амаль 42, "Дабраном" - 12. Гэта што, нармальна? Яны што, працуюць больш, чым прадавец?"
Пасля завяршэння нарады старшыня Камітэта дзяржкантролю Васіль Герасімаў расказаў журналістам, што ў шэрагу выпадкаў зарплаты ў кіраўніцтва гандлёвых сетак як раслі, так і растуць. "Яны мінулы раз, я агучваў лічбы, былі вялікія. То цяпер... Напрыклад, калі ў чалавека была зарплата Br148 тыс., то цяпер яна Br193 тыс. У некаторых зарплаты скочылі ў 4 разы. У некаторых у два разы. Нехта атрымлівае Br147 тыс., нехта Br98 тыс., нехта Br36 тыс. А Br36 тыс. на фоне Br193 тыс. здаецца ўжо і... (не такой высокай лічбай. - Заўвага БЕЛТА)", - расказаў ён.
Але справа нават не ў зарплатах кіраўніцтва, а сацыяльнай справядлівасці, аб чым гаварыў Прэзідэнт. "Калі б быў адпаведны рывок і па зарплатах служачых, але гэтага не адбываецца. А калі браць эканамічны вынік работы сетак, то ў прынцыпе за мінулы год па прыбытку яны спрацавалі ў два разы больш, чым у 2021 годзе. Гэта значыць рэсурсы ў іх ёсць", - канстатаваў старшыня КДК.
"Калі браць зарплаты касіраў, то гэта Br800-1200. І я не сказаў бы, што яна расце сямімільнымі крокамі ў залежнасці ад таго прыбытку, які атрымлівае тая ці іншая гандлёвая сетка. Гэта пытанне сацыяльнай справядлівасці, якое паднімае Прэзідэнт, павінна быць вырашана", - падкрэсліў Васіль Герасімаў.
Ён таксама адзначыў, што суадносіны зарплат у прамысловасці ў Беларусі ўстаноўлены на ўзроўні 1 і 8. "Вось нешта аналагічнае павінна быць і ў іх (у гандлі. - Заўвага БЕЛТА). Або ж ісці па шляху іншых краін, калі абкладаюцца звышдаходы вялікім падаткаабкладаннем. Цяпер мы ў бліжэйшы час выпрацуем гэтыя шляхі. Плюс было даручэнне, што сеткі павінны несці нейкую сацыяльную нагрузку. Вось у нас, напрыклад, з Міністэрствам аховы здароўя ёсць пэўныя задумкі. Гэта была б добрая справа", - рэзюмаваў Васіль Герасімаў.-0-
