26 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка назначыў сёння Юрыя Шулейку старшынёй Брэсцкага аблвыканкама, перадае карэспандэнт БЕЛТА.
З мая 2017 года Юрый Шулейка займаў пасаду памочніка Прэзідэнта - інспектара па Гомельскай вобласці.
"Мы з вамі ўжо гаварылі на тэму вашага назначэння. Мы грунтоўна абмеркавалі аспекты вашай работы на Гомельшчыне і размаўлялі па Брэсце. Вы разумееце, што там трэба рабіць", - адзначыў Аляксандр Лукашэнка.
Прэзідэнт дадаў, што ён мае намер наведаць Гродзенскую вобласць, а потым будзе планаваць паездку ў Брэст. "Вы ўжо ўвойдзеце ў курс справы (думаю, вам шмат часу для гэтага не трэба: вы працуеце на такой пасадзе ў канкрэтным рэгіёне, ведаеце напрамкі работы, вопыт у вас вялікі) і даложыце мне аб праблемах Брэстчыны і асабліва Брэста з улікам падзей мінулага года, каб мы маглі сарыентавацца па далейшай рабоце, - паставіў задачу кіраўнік дзяржавы. - Брэст і Брэсцкая вобласць - рэгіён добры, людзі там нармальныя. Я там служыў, ведаю гэтых людзей. Але ёсць аблудныя, з імі трэба працаваць. Вы ведаеце і ўмееце з імі працаваць, у Гомельскай вобласці вы гэтаму навучыліся".
Кіраўнік дзяржавы таксама ўзгадніў сёння назначэнне Міхаіла Дзямідава старшынёй Клімавіцкага райвыканкама. Да гэтага ён быў першым намеснікам старшыні, начальнікам упраўлення па сельскай гаспадарцы і харчаванні Бялыніцкага райвыканкама.
"Што датычыцца вашага раёна, які вы пакідаеце, - гэта добры раён. Калі я вывучаў вашы асабістыя матэрыялы, я падумаў, што вы як спецыяліст, заатэхнік, урач перанесяце гэты вопыт на Клімавіцкі раён. Вельмі хацелася б. І ў гэтых адносінах мы будзем вас падтрымліваць, - запэўніў Прэзідэнт. - Клімавіцкі раён - значны, асноўны раён на Магілёўшчыне. Вельмі хацелася б, каб у вас атрымалася. Перспектывы ў вас добрыя".
Аляксандр Лукашэнка паабяцаў у гэтым годзе абавязкова наведаць Клімавічы, магчыма, у час пасяўной або ўборачнай кампаніі. "Там ужо канкрэтна, увайшоўшы ў курс справы, вы раскажаце, у якім напрамку будзе развівацца гэты раён", - сказаў ён.
Юрый Шулейка нарадзіўся ў 1968 годзе ў гарадскім пасёлку Казлоўшчына Дзятлаўскага раёна Гродзенскай вобласці. У 1992 годзе скончыў Магілёўскі тэхналагічны інстытут, у 2002-м - Акадэмію кіравання пры Прэзідэнце Беларусі. У перыяд з 1986 па 1988 год служыў у радах Савецкай Арміі.
Працоўную дзейнасць пачаў з 1992 года, працуючы майстрам па рамонце тэхналагічнага абсталявання, выконваючым абавязкі галоўнага энергетыка Гродзенскага мясакамбіната. У 1994 годзе заняў пасаду начальніка мясацэха сельгаспрадпрыемства "Абухава" Гродзенскай вобласці, у 1996 годзе - намеснік дырэктара - начальніка перапрацоўчага комплексу Зэльвенскай цеплаэлектрасеткі. У перыяд з 1996 па 2005 год працаваў начальнікам аддзела механізацыі і аўтаматызацыі вытворчых працэсаў ААТ "Гродзенскі мясакамбінат".
З 2005 года займаў кіруючыя пасады на розных прадпрыемствах: дырэктара Лідскага мясакамбіната (2005-2007), генеральнага дырэктара прадпрыемства "Гродзенскія мясамалочныя прадукты" (2007-2008), генеральнага дырэктара дзяржаб'яднання "Гроднамясамалпрам" (2008-2012).
У 2012 годзе назначаны першым намеснікам старшыні Гродзенскага гарвыканкама, у 2013-м - намеснікам старшыні Гродзенскага аблвыканкама, у 2017-м - памочнікам Прэзідэнта Беларусі - інспектарам па Гомельскай вобласці.-0-
