31 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка 31 жніўня прыняў з дакладам старшыню Дзяржаўнага мытнага камітэта Уладзіміра Арлоўскага, паведамляе БЕЛТА.
Справы ў рабоце ведамства ў цэлым складваюцца нядрэнна, але ва ўмовах санкцыйнага націску на Беларусь і часам няпростых узаемаадносін з некаторымі суседнімі краінамі лішняя ўвага, у тым ліку на вышэйшым узроўні, гэтай сферы дакладна не перашкодзіць. "Павінен сказаць, што сістэма, якую вы ўзначальваеце, спрацавала ў гэтым годзе - пакуль - станоўча. Паводле даных, па тых лічбах, якія вы прадставілі, працуем станоўча. Дай бог вытрымаць гэта на працягу бягучага года", - сказаў Аляксандр Лукашэнка.
Паводле слоў кіраўніка дзяржавы, аналіз сітуацыі сведчыць, што Беларусь спраўляецца са сваёй роляй на міжнароднай арэне ў сферы эканомікі. "Мы краіна транзітная, патэнцыял транзітны ў нас велізарны. І мы захавалі рэпутацыю надзейнага партнёра і цалкам забяспечваем свае функцыі ў плане рэалізацыі гэтага транзітнага патэнцыялу", - падкрэсліў Прэзідэнт.
Задача - захаваць тэмп і максімальна напоўніць бюджэт
Прэзідэнт адзначыў, што, нягледзячы на існуючыя складанасці, у тым ліку санкцыйны націск, на 12 працэнтаў павялічыўся паток грузавых транспартных сродкаў, якія прайшлі праз мытную граніцу. "Гэта добрая тэндэнцыя", - звярнуў ён увагу.
"За 8 месяцаў на 100 тысяч грузавікоў больш перасекла граніцу, чым у мінулым годзе", - удакладніў Уладзімір Арлоўскі.
"Думаю, што да канца года можам яшчэ крыху і дабавіць", - лічыць кіраўнік дзяржавы.
Адпаведна, у плюсе і рэспубліканскі бюджэт. За 8 месяцаў бягучага года пералічаная сума кантралюемых ДМК плацяжоў на 25 працэнтаў больш, чым за аналагічны перыяд 2020 года (усяго на 27 жніўня 2021 года ў рэспубліканскі бюджэт паступіла такіх плацяжоў на Br6,4 млрд). "Гэта дадаткова Br1,3 млрд. Сур'ёзная сума. Гэту асноўную задачу мы выконваем. Прэзідэнтам пастаўлена задача гэты тэмп перавышэння плацяжоў пастарацца захаваць і максімальна напоўніць бюджэт", - адзначыў Уладзімір Арлоўскі.
А што з мадэрнізацыяй пунктаў пропуску?
Аляксандр Лукашэнка асобна акцэнтаваў увагу на гэтым моманце. Паводле яго слоў, удасканальваць мытную інфраструктуру важна, асабліва калі ўлічваць пастаянны рост грузапатоку. "Як ідуць справы на граніцы з будаўніцтвам гэтых пунктаў пропуску? Гэта вельмі важна", - падкрэсліў Прэзідэнт.
Уладзімір Арлоўскі праінфармаваў Прэзідэнта аб выніках вырашэння пастаўленых задач. Паводле яго слоў, усе даручэнні кіраўніка дзяржавы выконваюцца. "Не толькі наша інфраструктура дазваляе павелічэнне патоку (грузавога транспарту. - Заўвага БЕЛТА), але і нашы тэхналогіі. Мы стараемся афармляць хутка, не прыдзірацца. У нас 94 працэнты ўсяго транзітнага патоку на граніцы афармляецца на працягу 10 хвілін", - заявіў старшыня Дзяржаўнага мытнага камітэта.
У цэлым звернута ўвага на пытанні забеспячэння транзітнай прывабнасці Беларусі. "Тут Прэзідэнтам пастаўлена задача як далей развіваць нашу пагранічную інфраструктуру, так і скарачаць час мытнага кантролю. Але пры гэтым не губляць кантроль за таварамі, каб не было ўвозу ў краіну кантрабанды, эканамічных парушэнняў на граніцы. І, вядома, - процідзеянне самым небяспечным відам парушэнняў - увозу наркотыкаў, зброі, боепрыпасаў", - адзначыў у размове з журналістамі кіраўнік ведамства.
Дарэчы, у гэтым годзе значныя сродкі былі накіраваны на рэканструкцыю пункта пропуску "Верхні Церабяжоў". Яго прапускная здольнасць павялічылася ў 3,5 раза і склала 900 аўтамабіляў у суткі. Пра эфектыўнасць праводзімай мадэрнізацыі інфраструктуры сведчыць паступовае павелічэнне прапускной здольнасці пунктаў пропуску: калі ў 2002 годзе яна складала 11 тыс. аўто ў суткі, то да пачатку 2021 года гэты паказчык дасягнуў 32 тыс.
Дык хто вінаваты ў чэргах на граніцы?
Штодзённа паведамляецца аб сотнях, а часам і тысячах велікагрузаў, якія прастойваюць у чэргах на граніцы Беларусі з Еўрасаюзам. Як стала вядома, гэта тэма таксама ў Прэзідэнта абмяркоўвалася. "У асноўным прычына ўтварэння чэргаў грузавікоў на граніцы - гэта не заўсёды рытмічная работа нашых сумежных калег. Асабліва гэта відаць па літоўскім напрамку. Чэргі бываюць, асабліва ў выхадныя дні збіраюцца вялікія", - расказаў Уладзімір Арлоўскі.
Ён падкрэсліў, што задача беларускага боку ў гэтай сітуацыі - дапамагчы вадзіцелям, перавозчыкам у стварэнні для іх камфортных умоў. "Такая задача пастаўлена кіраўніком дзяржавы, - сказаў кіраўнік ведамства. - Калі мы нічога не можам зрабіць і неяк паўплываць на работу нашых калег, тады мы стараемся стварыць умовы на нашым баку для чакання праходжання граніцы".
Уладзімір Арлоўскі расказаў, што ў гэтым годзе на самым напружаным вільнюскім напрамку "Каменны Лог - Мядзінінкай" ужо стварылі пляцоўку электроннай чаргі. Вадзіцелі там могуць адпачываць і чакаць сваёй чаргі для праходжання граніцы. "Тым больш у пункце пропуску "Мядзінінкай" на літоўскім баку ідзе рэканструкцыя. Прапускная здольнасць у два разы знізілася. Таму мы своечасова зрабілі гэту пляцоўку. Таксама ў бягучым годзе мы створым такую пляцоўку ў пункце пропуску "Беняконі", - праінфармаваў кіраўнік ДМК.
Аб падтрымцы кампаній ва ўмовах санкцый. Што можа зрабіць мытня?
Прымаючы з дакладам кіраўніка ДМК, Аляксандр Лукашэнка не абмінуў і санкцыйную праблематыку. "У гэтай сітуацыі, вядома, роля Мытнага камітэта вялікая. Як мы дапамагаем нашым кампаніям, прадпрыемствам? Вы разумееце, што націск на граніцы да таго націску санкцыйнага - гэта будзе ўжо залішне для нашых кампаній", - сказаў кіраўнік дзяржавы. Паводле яго слоў, неабходна падтрымаць беларускія прадпрыемствы ў тым ліку і ў мытным плане.
Пазней у размове з журналістамі Уладзімір Арлоўскі растлумачыў, у чым менавіта заключаецца такая падтрымка і дапамога: "Тое, што ад нас залежыць, - гэта, вядома, хуткасць афармлення і прыняцця рашэнняў. Гэта значыць, мы ўкараняем такія механізмы, якія выключаюць чаканне суб'ектаў гаспадарання ў афармленні дэкларацый".
Асноўны праект бягучага года - гэта цэнтр электроннага дэкларавання. Навацыя ў тым, што прадстаўнік суб'екта гаспадарання накіроўвае сваю дэкларацыю праз інтэрнэт у мытную сістэму, і гэта дэкларацыя афармляецца не там, дзе знаходзіцца тавар, а дзе інспектар менш за ўсё загружаны і больш за ўсё супрацоўнікаў мытні. "Такім чынам перыяд чакання афармлення практычна сыходзіць", - растлумачыў Уладзімір Арлоўскі.
Далей адбываецца працэс афармлення, які апошнім часам таксама паскорыўся. "85 працэнтаў экспарту ў нас афармляецца на працягу 5 хвілін. Палова імпарту афармляецца на працягу гадзіны. Раней былі гадзіны і суткі. Больш таго, у нас 32 працэнты дэкларацый усіх тавараў афармляецца аўтаматычна праграмным прадуктам. Гэта паскарэнне дае магчымасць скараціць этап дастаўкі сыравіны, абсталявання і камплектуючых да вытворчасці. І скараціць вываз гатовай прадукцыі па часе. А кожная гадзіна - гэта грошы", - расказаў Уладзімір Арлоўскі.
Што замоўчвае Захад і прычым тут наркотыкі
Кіраўнік дзяржавы пацікавіўся, якія вынікі дасягнуты ДМК у праваахоўнай дзейнасці. Асаблівую ўвагу ён звярнуў на барацьбу з незаконным абаротам наркотыкаў.
"Нас жа заходнікі вечна абвінавачваюць у тым, што мы займаемся кантрабандай, то цыгарэты не тыя да іх трапілі, то нелегальная міграцыя, яшчэ нейкія праблемы. Але яны нічога не гавораць аб тым, што мы маем ад іх, асабліва наркаты, сінтэтычных наркотыкаў, якія паступалі і паступаюць з Еўропы. Яны гэта замоўчваюць, таму што нявыгадна", - заўважыў Аляксандр Лукашэнка.
Паводле даных на 27 жніўня, выяўлена 335 фактаў незаконнага перамяшчэння наркотыкаў (за аналагічны перыяд 2020 гады - 207 выпадкаў). З незаконнага абароту канфіскавана больш за 433 кг наркотыкаў, што ў пяць разоў больш, чым у мінулым годзе.
"Праваахоўны напрамак мы таксама абмеркавалі ў кіраўніка дзяржавы. Пастаўлена задача на гэтым напрамку паставіць жорсткую заслону правапарушэнням. Кантрабанда - гэта найбольш сур'ёзны від парушэнняў, таму што нясе вялікую шкоду", - заявіў па выніках даклада Уладзімір Арлоўскі.
Ён адзначыў тэндэнцыю: апошнім часам у сувязі з сітуацыяй і абмежаваннямі, выкліканымі пандэміяй, часцей за ўсё наркотыкі спрабуюць увезці на грузавіках. "Адбылася ў гэтым годзе пераарыентацыя. Рух легкавых аўтамабіляў невялікі праз граніцу, фізічныя асобы сталі менш перасякаць. Але пераарыентаваліся на ўвоз на грузавіках", - сказаў старшыня ДМК.
Ён расказаў, што адну з буйных партый канфіскавалі на мінулым тыдні на ўкраінскай граніцы: 8 кг гашышу і марыхуаны знайшлі ў кабіне вадзіцеля грузавіка. "Везлі ў Расійскую Федэрацыю. Гэта недзе 30 тыс. доз", - удакладніў старшыня ДМК.
"Таму тут барацьба з наркотыкамі ў нас на першым плане. Акрамя наркотыкаў і незаконны ўвоз валюты, зброі, боепрыпасаў. Мы за гэтым усім вельмі ўважліва глядзім і ставім перашкоду ўвозу ў нашу краіну", - дадаў Уладзімір Арлоўскі.-0-
