27 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка зрабіў сёння рабочую паездку ў Петрыкаўскі раён Гомельскай вобласці. Кіраўнік дзяржавы прыняў удзел ва ўрачыстай цырымоніі ўводу ў эксплуатацыю Петрыкаўскага горна-абагачальнага камбіната ААТ "Беларуськалій".
На ўрачыстае мерапрыемства запрасілі членаў урада, кіраўнікоў дзяржаўных органаў, прадстаўнікоў мясцовай вертыкалі ўлады, топ-менеджараў "Беларуськалія" і працоўны калектыў прадпрыемства.
"Сёння без перабольшання гістарычны для Беларусі дзень. Мы адкрываем чарговы знакавы аб'ект - Петрыкаўскі горна-абагачальны камбінат", - сказаў Аляксандр Лукашэнка.
Кіраўнік дзяржавы ажыццявіў сімвалічны запуск прадпрыемства, націснуўшы на пульце кіравання кнопку запуску горна-шахтавага праходчага камбайна. Працэс работы тэхнікі на глыбіні дэманстраваўся ўдзельнікам мерапрыемства анлайн.
Петрыкаўскі горна-абагачальны комплекс будавалі амаль 10 гадоў, на работы было патрачана каля $1,25 млрд, хоць першапачаткова планавалі $1,5 млрд. Запасаў калійнай руды тут хопіць на 100 гадоў.
Аляксандр Лукашэнка падзякаваў усім, хто мае адносіны да стварэння гэтага ўнікальнага аб'екта: праекціроўшчыкам, інжынерам, будаўнікам, шахцёрам. Работы выконваліся выключна беларускімі падраднымі праектнымі, будаўнічымі і мантажнымі арганізацыямі, а доля айчыннага абсталявання склала больш за 85 працэнтаў.
"Я сапраўды адчуваю гонар за ўсіх вас, выдатных спецыялістаў і майстроў сваёй справы", - заявіў кіраўнік дзяржавы. Напярэдадні Дня шахцёра Аляксандр Лукашэнка павіншаваў калектыў "Беларуськалія" і ветэранаў прадпрыемства з прафесійным святам.
"Беларуськалій" - самы надзейны партнёр у свеце. Нават ва ўмовах санкцый
"Калій - брэнд нашай краіны. Нам нашанцавала, што айчынныя нетры багатыя на чырвонае золата. Попыт на яго вялізны і расце з году ў год, - адзначыў Аляксандр Лукашэнка. - "Беларуськалій" - адзін з вядучых ігракоў на сусветным рынку ўгнаенняў, вырабляе і прадае больш за 20 працэнтаў калійных угнаенняў. Але самае галоўнае (я не пабаюся гэтага слова, паколькі паглыблены ў вытворчасць і продажы калійных угнаенняў), гэта самы надзейны партнёр у свеце. І мы ніколі не падводзілі і не падвядзём сваіх партнёраў".
Прэзідэнт падкрэсліў, што нават цяпер, калі рэспубліку выпрабоўваюць на трываласць рознымі санкцыямі ЗША і краіны ЕС, калі збеглыя апазіцыянеры гэтыя санкцыі выпрошваюць, Беларусь нікога не падводзіць і абавязкова выканае ўсе свае абавязацельствы. "Мы, наадварот, шукаем новыя адрасы паставак, новыя магчымасці дастаўкі тавару. У калійных угнаеннях з Беларусі сёння зацікаўлены такія гіганты, як Кітай, Бразілія, Індыя, і мноства іншых краін, - заўважыў кіраўнік дзяржавы. - Свет вялікі. З-за пандэміі каранавіруса на планеце яшчэ больш востра паўстала пытанне забеспячэння прадуктамі харчавання, значыць, і ўгнаеннямі".
Паводле яго слоў, беларусам складана паверыць, што праблема голаду магчыма ў XXI стагоддзі, але тым не менш гэта так, лічыць Аляксандр Лукашэнка. "Цяпер вялізны попыт на прадукты харчавання. Амаль мільярд чалавек недаядае, паўмільярда галадаюць: не хапае. А прадукты харчавання - гэта матухна-зямля, глеба. А без угнаенняў ніякіх прадуктаў харчавання быць не можа. Таму попыт на ўгнаенні наогул і калійныя ў тым ліку ў свеце расце і будзе расці. Мы гатовы дапамагаць, таму і будуем гэтыя гіганты", - перакананы беларускі лідар.
Першыя два гады хоць бы $0,5 млн, а трэці, чацвёрты, пяты - па $1 млн
З уводам Петрыкаўскага ГАК Беларусь умацоўвае свае пазіцыі на сусветным калійным рынку. А ўвесь Петрыкаўскі раён, і гэта таксама немалаважна, атрымлівае новы стымул для развіццяю "Будзем спадзявацца, хутка дагоніць Салігорск і па зарплатах, і па ўзроўні жыцця", - сказаў Аляксандр Лукашэнка.
Прэзідэнт заўважыў, што ў раённым цэнтры ўжо зроблена нямала. На добраўпарадкаванне горада выдзелена каля Br50 млн, абноўлена амаль уся яго інфраструктура. "Я хачу, каб петрыкаўцы разумелі: гэта сабрана з усёй краіны і ў гэтым перавага нашага сацыяльнага ўкладу і нашага развіцця, калі пакрыху адусюль ствараем гэтыя апорныя кропкі развіцця нашай дзяржавы", - падкрэсліў беларускі лідар.
Што датычыцца Петрыкаўскага раёна, то тут справа ў тым ліку за "Беларуськаліем", які ў тым ліку павінен быць зацікаўлены ў развіцці рэгіёна і стварэнні камфортных умоў жыцця для сваіх работнікаў. "Напэўна, Іван (генеральны дырэктар ААТ "Беларуськалій" Іван Галаваты. - Заўвага БЕЛТА), трэба нам арыентавацца на тое, што дапамагаць ім тут трэба будзе, хоць праблем хапае і ў "Беларуськалія". Але давай дамовімся, што першыя два гады хоць бы паўмільёна долараў у год. Ну а трэці, чацвёрты, пяты па мільёну ім тут трэба даваць. Але не грошы. А вы са старшынёй выканкама сядзеце, ты, як чалавек дасведчаны ў гэтым плане, увесь свет аб'ехаў, павінен паглядзець, дапамагчы: давайце вось гэта зробім, тут нешта дабавім", - сказаў Прэзідэнт.
Аляксандру Лукашэнку далажылі аб перспектывах развіцця ААТ "Беларуськалій" і непасрэдна Петрыкаўскага ГАК, вырашэнні пытанняў у сацыяльнай сферы, забеспячэнні работнікаў жыллём. Цяпер ужо ўзведзена некалькі шматкватэрных дамоў для работнікаў прадпрыемства. Пабудаваны таксама дзіцячы сад, выдзелены грошы на рэканструкцыю радзільнага дома, абмеркаваны пытанні выдзялення зямлі пад будаўніцтва спартыўнага комплексу, дзе будзе і басейн.
Асобна кіраўнік дзяржавы цікавіўся кадравымі пытаннямі. Прэзідэнта запэўнілі, што яны вырашаюцца. Цяпер на Петрыкаўскім ГАК працуюць каля 850 чалавек. Па меры выхаду на праектную магутнасць колькасць персаналу вырасце да 1,2-1,3 тыс. чалавек. "Едуць практычна з усіх абласцей Беларусі. Сёння ў нас ёсць праграма навучання маладых людзей. Ёсць курсы, праграмы, якія мы зрабілі ў сярэдніх спецыяльных установах у Гомельскай вобласці. Навучаем і ў Салігорску, і ў Мінску ў БНТУ. Дзякуючы той падтрымцы і сацыяльнай праграме, якая ёсць у рэгіёне, Петрыкаве, людзі з задавальненнем едуць. Сярэдні ўзрост работнікаў сёння на камбінаце 33 гады", - расказаў Іван Галаваты.
Як і ў час нядаўняга наведвання Мінскай вобласці, кіраўнік дзяржавы звярнуў увагу на пытанні навядзення парадку на зямлі, увядзення ў абарот аб'ектаў і тэрыторый, якія не выкарыстоўваюцца. Ён папярэдзіў, што гэту тэму трэба пастаянна трымаць у полі зроку. "Загадзім краіну - потым яшчэ два пакаленні будуць гэта ў парадак прыводзіць, - акцэнтаваў увагу беларускі лідар. - А то мы ствараем хараство (гаворка аб увядзенні ў строй новых сучасных прадпрыемстваў накшталт Петрыкаўскага ГАК. - Заўвага БЕЛТА), а вакол будзе бруд".
Палессе - соль беларускай нацыі
Размова аб развіцці Петрыкаўскага раёна плаўна перайшла на больш глабальны ўзровень. У практыцы кіраўніка дзяржавы - маштабіраваць такія пытанні як мінімум на ўзровень рэгіёна. "Трэба падтрымліваць Палессе. І ў нас атрымаецца - гэты кавалак ад Мазыра да Пінска, - падкрэсліў беларускі лідар. - Гэту тэрыторыю трэба развіваць. Усё ж такі палешукі ў нас не абдзелены ўвагай, але мы асабліва іх тут і не абагацілі. Трэба падтрымліваць Палессе. І ў нас атрымаецца - гэты кавалак ад Мазыра да Пінска - гэты кавалак Палесся. Тут Петрыкаў якраз павінен развіцца. Жыткавічы - сам горад - добры, там ужо даўно парадак навялі, але, вядома, трэба ў сельскай гаспадарцы глядзець. Тураў - добры гарадок і вакол яго парадак. Петрыкаў, Жыткавічы - вось гэту граду трэба прыводзіць у парадак".
Аляксандр Лукашэнка назваў палешукоў і Палессе соллю беларускай нацыі: "Вы ведаеце маё стаўленне да палешукоў. У мяне заўсёды была мара: прыкласці максімум намаганняў для адраджэння нашага Палесся. Мне заўсёды хацелася нешта для палешукоў зрабіць добрае".
На сустрэчы з калектывам ГАКа ён яшчэ раз прыгадаў горад Жыткавічы, назваўшы яго цудоўным непрамысловым раённым цэнтрам. "Ён мяне здзівіў, - заявіў Прэзідэнт. - А Тураў? Гэта наогул жамчужына Беларусі".
Паводле яго слоў, раней Петрыкаў недацягваў да гэтых населеных пунктаў. Але цяпер горад прыведзены ў парадак, а будаўніцтва горна-абагачальнага комплексу дало магчымасць стварыць паўтары тысячы працоўных месцаў. "Задума была такой, каб развіць Прыпяць, гэты Палескі край. І вось гэта жамчужына, якую мы будавалі каля 10 гадоў, якраз укладваецца ў тую задуму. Але гэта не канец, мы будзем прадаўжаць працаваць і далей", - падкрэсліў Аляксандр Лукашэнка.
Украінцы - гэта нашы людзі
На ўрачыстай цырымоніі сёння прысутнічаў і дэпутат Вярхоўнай рады Украіны Яўген Шаўчэнка. Апошнім часам ён часты і пажаданы госць у нашай краіне. На гэты раз прыехаў не адзін, а з украінскімі журналістамі - здымаюць фільм пра Беларусь, каб паказаць яе сапраўднай, а не так, як гэта цяпер прынята на Захадзе, ды і часта ў самой Украіне.
Аляксандр Лукашэнка падкрэслівае, што тую ж калійную галіну (і не толькі ў Беларусі) развіваюць не толькі для сябе, але і для ўсяго свету і перш за ўсё для суседзяў. Побач - Украіна, якая была жытніцай Савецкага Саюза. "Яна і будзе жытніцай. Яна мае патрэбу ў велізарнай колькасці мінеральных угнаенняў, у тым ліку калійных", - прывёў прыклад кіраўнік дзяржавы.
Паводле яго слоў, сёння, нягледзячы на пазіцыю ўкраінскага кіраўніцтва, беларускі бок вядзе дыялог аб тым, каб не парваць эканамічныя адносіны, і думае аб развіцці супрацоўніцтва. "Украінцы - гэта нашы людзі. Мы ў любых сітуацыях будзем ставіцца па-чалавечы да гэтых людзей, як бы сябе там ні пазіцыянаваў ваш Прэзідэнт", - запэўніў беларускі лідар.
"Помню, як трашчаў нада мной дах". Пра спуск у шахту на 600 м
Размаўляючы з калійшчыкамі, Аляксандр Лукашэнка падзяліўся з імі ўспамінамі пра асабісты вопыт спуску ў шахту. Ён быў разам з малодшым сынам Мікалаем і агледзеў лаву - падземную горную вырабатку. "Мы спусціліся на глыбіню, як мне дакладвалі, 600 метраў. Праехалі. На імпартным нейкім трактары мяне везлі да гэтага камбайна. І я, як звычайна: "А чыё гэта?" - Не наша. Сёння мы перамяшчаемся на сваім транспарце. Гэта значыць, мы пакрыху займаліся імпартазамяшчэннем. Ну а ў мяне малыш быў зусім яшчэ маленькі. Недзе кадры гэтыя ёсць. Яны прывезлі да гэтага камбайна. Ён мяне за руку цягне ў лаву гэту. Помню, такі мудры-мудры шахцёр кажа: "Аляксандр Рыгоравіч, не перажывайце, пойдзем!" - успомніў кіраўнік дзяржавы. - Селі і глядзім. І ў мяне да гэтага часу ўражанні засталіся: я помню, як трашчаў гэты дах нада мной. Гэта ж трэба прывыкнуць, каб кожны раз працаваць там і не баяцца гэтага! Трашчыць гэта ўсё над табой".
Аляксандр Лукашэнка тады спытаў у аднаго з вопытных шахцёраў, ці можа абваліцца. "Можа, але наўрад ці", - такі быў адказ.
Прэзідэнт падкрэсліў, што шахцёры-калійшчыкі многае далі Беларусі. І размова не толькі пра калійныя ўгнаенні. Напрыклад, у старых вырабатках стварылі спелеакамеры, дзе праходзяць лячэнне людзі з захворваннямі органаў дыхання. "Я размаўляў з людзьмі, якія праходзілі гэта лячэнне. Кажуць, што на год хапае", - адзначыў кіраўнік дзяржавы.
"Гэта значыць, шмат шахцёры падарылі Беларусі. Не кажучы ўжо аб тым, што дапамагаюць і спорту, і ў ахове здароўя, і па іншых напрамках працуюць. Таму вы проста малайцы і вялікі вам дзякуй!" - падкрэсліў Аляксандр Лукашэнка.
Беларусаў нідзе не чакаюць, толькі карачыцца на клубніцах у калякаў або немцаў
"Шануйце сваю зямлю. Лепшага краю, чым Беларусь, асабліва ў вас тут, на Палессі, у свеце няма. Я пабываў паўсюль. Няма лепшага краю, чым тут. Ну а мы будзем старацца ствараць для вас умовы для таго, каб вы маглі карміць сваіх дзяцей. Таму давайце створым гэту зямлю для сябе і сваіх дзяцей. І захаваем нашу суверэнную і незалежную Беларусь, - заклікаў беларускі лідар. - Ведайце, што як мая Беларусь, так гэта і ваша зямля. І нашым дзецям жыць тут. Цаніце гэта. Мы перажываем няпросты час. Не толькі мы. Многія краіны. Паўсюль вельмі шмат праблем".
Аляксандр Лукашэнка падкрэсліў, што беларусаў нідзе ў іншых дзяржавах не чакаюць, а таму трэба старацца будаваць сваё жыццё ў роднай краіне. "А калі хтосьці і чакае... Можа, на плантацыях, як часта ўкраінцы кажуць, у палякаў там ці ў немцаў карачыцца, збіраць клубніцы. Дык лепш у сябе вырошчваць гэта і ў свабодны ад работы час займацца карыснай працай", - сказаў Прэзідэнт.
Кіраўнік дзяржавы на прыкладзе Петрыкава расказаў, як можна не толькі знайсці дадатковую крыніцу прыбытку і стварыць працоўныя месцы, але і ўключыць у абарот закінутыя тэрыторыі, якія не выкарыстоўваюцца. "У Петрыкаве вызвалілі шмат пляцовак. Яны занядбаныя, але там добрая інфраструктура. Я губернатару кажу: ну невялікія грошы, вазьміце цяпліцы пастаўце, стварыце што-небудзь на электрычнасці. Электрычнасці хапае ў краіне. Я гатовы падключыцца і дапамагчы", - сказаў ён.
Пра ганьбу беларускіх хакеістаў і траты "Беларуськалія" на спорт
Як ужо адзначалася, з уводам горна-абагачальнага комплексу Петрыкаўскі раён атрымлівае новы стымул для развіцця. Падставіць плячо гораду і сам "Беларуськалій", які, акрамя таго, часта выступае спонсарам розных спартыўных мерапрыемстваў і каманд.
Аднак, улічваючы рэзультаты ў шэрагу відаў спорту, Аляксандр Лукашэнка выказаў сумненне, ці варта прадпрыемству так маштабна спансіраваць, напрыклад, той жа хакей і футбол.
"Я яго папрасіў, каб ён асабліва там не раскідваўся, вобразна кажучы, на хакеістаў і футбалістаў. Таму што паехалі ўчора ў Польшчу (там 20 чалавек у хакей гуляюць) - прайгралі. Такой ганьбы... Я, вядома, не крыўджу, не прыніжаю палякаў - яны малайцы, перамаглі "вялікіх". А мы іх спансіруем. Вось сярэдняя зарплата - няхай атрымліваюць, а потым за вынік нешта дабавім. Так і па футбалістах", - быў катэгарычны Прэзідэнт.
Як паведамлялася, 26 жніўня хакеісты зборнай Беларусі з паражэння стартавалі ў кваліфікацыйным турніры Алімпійскіх гульняў - 2022. У першым паядынку групы D у славацкай Браціславе беларусы ўступілі камандзе Польшчы з лікам 0:1 (0:0, 0:0, 0:1).
Дасталося ад Прэзідэнта і жонкам некаторых спартсменаў: "У нас атрымалася так: гэтыя там крыўляюцца на футбольных, хакейных пляцоўках, а жонкі ў іх - прыгажуні, у айфонах сядзяць і супраць дзяржавы ваююць. Працаваць трэба ўсім. І жонак туды трэба. Вось - на "Беларуськалій" - мятлу (даць. - Заўвага БЕЛТА").-0-
