5 студзеня, Мінск /Кар. БЕЛТА/.Са спецыяльнага фонду Прэзідэнта Рэспублікі Беларусь накіравана больш як Br745 тыс. на заахвочванне адораных навучэнцаў і студэнтаў, а таксама аказанне матэрыяльнай падтрымкі інтэлектуальнаму і творчаму аб'яднанням. Адпаведнае рашэнне савета спецфонду зацверджана распараджэннем, якое падпісаў кіраўнік дзяржавы Аляксандр Лукашэнка, паведамілі БЕЛТА ў прэс-службе беларускага лідара.
Пераможцам міжнародных алімпіяд і конкурсаў прысуджаны 25 гранд-прэмій з уручэннем нагруднага знака "Лаўрэат спецыяльнага фонду Прэзідэнта Рэспублікі Беларусь па сацыяльнай падтрымцы здольных навучэнцаў i студэнтаў", а пераможцам рэспубліканскіх алімпіяд і конкурсаў - 278 спецыяльных прэмій.
За асаблівыя поспехі ў вучобе, навукова-даследчай і творчай дзейнасці 180 студэнтам і курсантам устаноў вышэйшай адукацыі назначана стыпендыя Прэзідэнта Беларусі.
Акрамя таго, у мэтах умацавання матэрыяльна-тэхнічнай і метадычнай базы аказана матэрыяльная падтрымка пошукаваму клубу "Пунсовыя пагоны" Гомельскага кадэцкага вучылішча і студэнцкай навукова-даследчай лабараторыі "Соцыум" Беларускага дзяржаўнага ўніверсітэта.
Распараджэнне кіраўніка дзяржавы накіравана на выяўленне і падтрымку найбольш матываваных і адораных студэнтаў, стварэнне спрыяльных умоў для далейшага развіцця іх здольнасцей і паспяховай вучобы.-0-
