6 сакавіка, Мінск /Кар. БЕЛТА/. Расія прапануе пабудаваць у Беларусі завод па вытворчасці беспілотных авіяцыйных сістэм з магутнасцю да 100 тыс. адзінак штогод. Аб гэтым было заяўлена ў час наведвання Прэзідэнтам Беларусі Аляксандрам Лукашэнкам выстаўкі найноўшых расійскіх беспілотнікаў, перадае карэспандэнт БЕЛТА.
"Пытанне ідзе аб стварэнні вытворчасці ўсіх ключавых кампанентаў. Гэта, вядома ж, пытанні забеспячэння суверэнітэту. Вельмі важна, каб у Беларусі былі ўласныя вытворчасці, якія рабілі б не толькі эканоміку, але і сферу бяспекі краіны сапраўды суверэннымі. Размова ідзе аб тым, каб выкарыстоўваць тэхналагічныя напрацоўкі і рашэнні, якія ёсць у Расіі", - сказаў журналістам намеснік кіраўніка Адміністрацыі Прэзідэнта Расійскай Федэрацыі Максім Арэшкін.
Ён адзначыў, што выкарыстанне адзінай тэхналагічнай платформы будзе забяспечваць у тым ліку эканамічную эфектыўнасць. Гэта таксама спрашчае вытворчасць і распрацоўку новых мадэлей.
Максім Арэшкін канкрэтызаваў, аб чым ідзе гаворка: "Завод, які знаходзіцца ў Беларусі, поўнасцю лакалізаваны, з прыўнясеннем усіх тэхналагічных кампетэнцый сюды, які адначасова працуе на адзінай тэхналагічнай платформе з заводамі ў Расіі і іншых краінах (мы не толькі пра Расію гаворым). Базавая прапанова - гэта будаўніцтва на працягу аднаго года такога завода, які можа выпускаць да 100 тыс. адзінак штогод. Гэта прапанова, якую зрабіў расійскі бок. Цяпер з калегамі беларускімі будзем абмяркоўваць, дзе, якая вытворчасць і гэтак далей. Нейкі час зойме ўзгадненне гэтых параметраў".
Намеснік кіраўніка Адміністрацыі Прэзідэнта Расіі падкрэсліў, што цяпер у свеце адбываецца рэвалюцыя ў галіне беспілотных авіяцыйных сістэм, якая мяняе і грамадзянскую, і ваенную сферу. "Тыя краіны, якія будуць у авангардзе гэтага працэсу, будуць атрымліваць усе выгады з пункту гледжання іншай, больш высокай якасці жыцця. І, вядома ж, больш эфектыўнае забеспячэнне бяспекі, - сказаў ён. - Мы паглядзелі на тое, які эфект укараненне перадавых беспілотных тэхналогій можа даць эканоміцы Беларусі. Гэта вялікія эфекты і ў сельскай гаспадарцы, і ў лагістыцы, і ў электраэнергетыцы, і ў шэрагу іншых напрамкаў. Таму якраз дэманстравалі, што можа быць рэалізавана, якія могуць прадпрыемствы атрымацца, як выбудаваць падрыхтоўку кадраў, як затым выкарыстоўваць новыя беспілотныя сістэмы для карысці Беларусі".
Але абмяркоўвалася не толькі тэма беспілотнікаў. Аляксандру Лукашэнку прадставілі перспектыўныя напрамкі супрацоўніцтва з Расіяй, аб чым падрабязна расказаў Максім Арэшкін. "Мы гаварылі пра лічбавыя маркетплэйсы, пра лагістыку. Шмат пра што гаварылі. Гэта новыя праекты, якія будуць даваць новую якасць эканамічнага ўзаемадзеяння і жыцця для нашых грамадзян", - заявіў прадстаўнік РФ.
Максім Арэшкін узгадаў перыяд некалькі гадоў таму, калі з яго ўдзелам Беларусь і Расія распрацоўвалі так званыя інтэграцыйныя карты, якія затым трансфармаваліся ў саюзныя праграмы. "Было вельмі шмат чутак, што нехта хоча пазбавіць Беларусь незалежнасці, далучыць і гэтак далей. Глупства абсалютнае. Мы бачым, што ўзгадненне па розных сферах стварае іншы ўзровень эканамічнай інтэграцыі, іншыя эканамічныя магчымасці. Гэта самае галоўнае - эканоміка. У тым ліку пытанне тэхналагічнае - адно з ключавых з пункту гледжання сумеснага руху наперад, дасягнення вынікаў. І беспілотныя сістэмы - гэта адна з тэхналагічных гісторый".-0-
Падпісвайцеся на нас у
