Сцяг Субота, 20 ліпеня 2024
Усе навіны
Усе навіны
Прэзідэнт
08 ліпеня 2024, 19:57

Павелічэнне дапамог і ўзмацненне падтрымкі сем'яў з дзецьмі. Лукашэнка падпісаў закон

Фота з архіва
Фота з архіва
8 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка падпісаў закон "Аб змяненні законаў па пытаннях дзяржаўных дапамог сем'ям, якія выхоўваюць дзяцей". Дакумент прыняты ў мэтах павышэння ўзроўню мінімальных гарантый грамадзянам у перыяд іх сацыяльнай неабароненасці. Аб гэтым БЕЛТА паведамілі ў прэс-службе беларускага лідара.

Для жанчын - рост дапамогі па цяжарнасці і родах

Законам прадугледжваецца, у прыватнасці, павелічэнне мінімальнага памеру дапамогі па цяжарнасці і родах. Для жанчын, за якіх выплачваюцца абавязковыя страхавыя ўзносы ў бюджэт дзяржаўнага пазабюджэтнага фонду сацыяльнай абароны насельніцтва, якія не маюць 6 месяцаў стажу (маладыя спецыялісты, жанчыны, якія пачынаюць працоўную дзейнасць), дапамога вырасце з 50 працэнтаў БПМ (бюджэту пражытачнага мінімуму) да 100 працэнтаў МЗП (мінімальнай заработнай платы) у месяц. А для тых, за каго не выплачваліся абавязковыя страхавыя ўзносы на сацыяльнае страхаванне ў бюджэт фонду, але якія маюць права на такі від дапамогі (навучэнцы, студэнткі, жанчыны, якія праходзяць службу, жанчыны, зарэгістраваныя ў якасці беспрацоўных), дапамога павялічыцца з 50 працэнтаў да 100 працэнтаў БПМ у месяц.

Дакумент таксама прадугледжвае павелічэнне мінімальнага памеру дапамогі па часовай непрацаздольнасці па доглядзе дзіцяці для застрахаваных жанчын, якія не маюць 6 месяцаў стажу. Такая дапамога вырасце з 50 працэнтаў БПМ да 100 працэнтаў МЗП (па аналогіі з дапамогай па цяжарнасці і родах).

Для сем'яў - навацыі па дапамозе на дзяцей старэйшых за 3 гады

Заканадаўчыя навацыі датычацца і асобных катэгорый сем'яў пры назначэнні дапамогі на дзяцей старэйшых за 3 гады. У прыватнасці, захоўваецца права на назначэнне такой дапамогі сем'ям з непаўналетнімі дзецьмі, у якіх дзіця-інвалід дасягнула ўзросту 18 гадоў, яму ўстаноўлена I група інваліднасці і адзін з бацькоў ажыццяўляе за ім догляд з атрыманнем адпаведнай дапамогі. А таксама права на назначэнне гэтай дапамогі на дзіця, якое выхоўваецца ў сям'і маці, калі бацька дзіцяці, абавязаны выплачваць аліменты, праходзіць тэрміновую ваенную або альтэрнатыўную службу.

Для бацькоў дзяцей-інвалідаў - узмацненне сацпадтрымкі

Узмацняецца сацыяльная падтрымка сем'яў, якія выхоўваюць дзіця-інваліда. Так, законам прадугледжана прадастаўленне бацькам права на атрыманне ўсіх відаў дзяржаўных дапамог у перыяд кароткатэрміновага знаходжання дзіцяці-інваліда ў доме дзіцяці ў сувязі з аказаннем яму медыка-сацыяльнай дапамогі. Акрамя таго, пашыраюцца правы на атрыманне дапамогі па часовай непрацаздольнасці па доглядзе дзіцяці-інваліда на перыяд яго санаторна-курортнага лячэння, медыцынскай рэабілітацыі, калі ў сям'і некалькі дзяцей-інвалідаў. У такіх выпадках прапануецца прадастаўляць права на атрыманне дапамогі іншай асобе (не бацькам), калі бацькі заняты доглядам другога свайго дзіцяці-інваліда, або дзвюх дапамог, калі абодва дзіцяці-інваліды ў адзін перыяд маюць патрэбу ў санаторным лячэнні, рэабілітацыі і іх суправаджаюць розныя асобы.

Для нядбайных бацькоў - больш строгі кантроль

У той жа час узмацняецца кантроль за мэтавым выкарыстаннем дзяржаўных дапамог у адносінах да сем'яў, дзе выяўлены выпадкі знаходжання дзяцей у неспрыяльнай для іх абстаноўцы. У прыватнасці, уведзены абавязак дзяржаўных органаў, арганізацый, якія назначаюць і выплачваюць дапамогі, прадстаўляць без згоды грамадзян інфармацыю аб атрымальніках дапамог і членах іх сем'яў па запытах устаноў адукацыі, якія праводзяць у адносінах да такіх сем'яў сацыяльнае расследаванне, а таксама камісій па справах непаўналетніх. Прадугледжана, што выплата дапамог спыняецца з дня ўступлення ў сілу рашэння суда аб адабранні дзіцяці, дня прыняцця органам апекі і папячыцельства або камісіяй па справах непаўналетніх рашэння аб адабранні дзіцяці.

Закон уступае ў дзеянне з 1 студзеня 2025 года.-0-
Падпісвайцеся на нас у
Twitter
Топ-навіны
Свежыя навіны Беларусі