13 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка 13 чэрвеня назначыў Наталлю Паўлючэнка міністрам працы і сацыяльнай абароны, перадае карэспандэнт БЕЛТА.
Да гэтага часу Наталля Паўлючэнка працавала на пасадзе першага намесніка міністра працы і сацыяльнай абароны.
"Я калі па тэлебачанні (па-мойму, ужо не адзін раз) яе бачыў і пару разоў бачыў Касцевіч (экс-міністр працы і сацыяльнай абароны, цяпер дэпутат Палаты прадстаўнікоў Ірына Касцевіч. - Заўвага БЕЛТА), думаў, а ёсць там у міністэрстве замена ці не? Або збоку трэба запрашаць? Але ўсё ж такі спыніўся на тым, што ёсць намеснік (жанчына, гэта немалаважна). Нядрэнна, калі будзе жанчына, таму што яна больш душэўная. І прафесіянал - яна ўсё ведае", - адзначыў Аляксандр Лукашэнка.
Як растлумачыў першы намеснік кіраўніка Адміністрацыі Прэзідэнта Максім Рыжанкоў, у свой час спецыяльна было прынята рашэнне перавесці Наталлю Паўлючэнка з Міністэрства фінансаў у Міністэрства працы і сацыяльнай абароны.
"Трэба быць добрым кіраўніком. Лёгка не будзе. Але і не раскідвацца льготамі і рознымі прывілеямі. Вы па сваёй ранейшай працы ведаеце, што лішніх грошай не бывае, грошы трэба заўсёды зарабляць. Мы ўжо і так зальгатавалі наша насельніцтва, што некаторыя проста сядзяць і чакаюць нейкіх ільгот. Я думаю, што нам трэба сур'ёзна прадумаць, аж да матэрыяльнай дапамогі шматдзетным і гэтак далей. Не сакрэт, што ў нас многа сем'яў шматдзетных, каго ўвогуле да рубля падпускаць нельга. І гэтыя грошы да дзяцей не даходзяць: іх прапіваюць ці яшчэ неяк. Таму трэба выпрацаваць сістэму, каб, падтрымліваючы шматдзетных (а мы будзем іх падтрымліваць, гэта пытанне нумар адзін для нас, і па жыллі і гэтак далей), устанавіць бар'ер і крытэрыі, як данесці грошы да дзяцей", - запатрабаваў Прэзідэнт.
"Нам трэба вельмі акуратна, не фармальна ставіцца да гэтых пытанняў. Каб грошы атрымлівалі тыя, каму яны прызначаны", - падкрэсліў кіраўнік дзяржавы.
Наталля Паўлючэнка нарадзілася ў 1977 годзе ў г.Жодзіна Мінскай вобласці. У 1998 годзе скончыла Беларускі камерцыйны ўніверсітэт кіравання па спецыяльнасці "фінансы і крэдыт". Працоўны шлях пачынала з пасады дзяржаўнага падатковага інспектара ў Жодзіне.
2002-2004 гады - эканаміст першай катэгорыі інспекцыі па бюджэце фінансавага аддзела Мінскага райвыканкама Мінскай вобласці.
2004-2006 гады - эканаміст першай катэгорыі інспекцыі даходаў бюджэту, эканаміст першай катэгорыі, вядучы эканаміст аддзела даходаў бюджэту фінансавага аддзела адміністрацыі Цэнтральнага раёна г.Мінска.
2006-2013 гады - вядучы эканаміст, галоўны эканаміст аддзела фінансавання невытворчай сферы і сацыяльнай абароны насельніцтва фінансавага ўпраўлення Мінскага аблвыканкама.
2013-2014 гады - начальнік упраўлення фінансавання невытворчай сферы галоўнага фінансавага ўпраўлення Мінскага аблвыканкама.
2014-2017 гады - намеснік начальніка галоўнага ўпраўлення - начальнік упраўлення бюджэтнага планавання галоўнага фінансавага ўпраўлення Мінскага аблвыканкама.
2017-2021 гады - кіраўнік Фонду сацыяльнай абароны насельніцтва Міністэрства працы і сацыяльнай абароны.
З 2021 па чэрвень 2024 года - першы намеснік міністра працы і сацыяльнай абароны.-0-
Падпісвайцеся на нас у
