Сцяг Субота, 13 ліпеня 2024
Усе навіны
Усе навіны
Прэзідэнт
03 чэрвеня 2024, 10:40

"Не рабіце нас ворагамі мангольскага народа". Лукашэнка адказаў на крытыку ў сувязі са СВА і падтрымкай Расіі

3 чэрвеня, Улан-Батар /Кар. БЕЛТА/. Прэзідэнт Беларусі Аляксандр Лукашэнка ў сваёй заяве па выніках перагавораў з Прэзідэнтам Манголіі Ухнаагійнам Хурэлсухам адказаў на крытыку, якая прысутнічае ў Манголіі, у сувязі з правядзеннем Расіяй СВА і падтрымкай, што аказваецца з боку Беларусі, перадае карэспандэнт БЕЛТА.

"Я прачытаў увесь агляд (СМІ. - Заўвага БЕЛТА). Асабліва звярнуў увагу на журналістаў Манголіі. І бачу, што яны проста ангажыраваны адным бокам. Яны не бачаць таго, што адбываецца. Не ўсе - асобныя журналісты. І гэта ўкідваецца ў грамадства. Не рабіце нас ворагамі мангольскага народа. Мы - вашы самыя блізкія сябры і браты. І мы з Прэзідэнтам (Манголіі. - Заўвага БЕЛТА) у эканоміцы дакажам, што мы шмат што можам тут зрабіць. Не менш, чым імперыі, з якімі вы мяжуеце, і развітыя дзяржавы. Я гэтага вельмі хачу, і мы гэта зробім", - заявіў Аляксандр Лукашэнка.

Ён канстатаваў, што частка насельніцтва ў Манголіі негатыўна ўспрыняла дапамогу, аказаную Беларуссю свайму саюзніку - Расіі - у сувязі з правядзеннем спецыяльнай ваеннай аперацыі ва Украіне. Таму ён растлумачыў сутнасць працэсаў для мангольскай аўдыторыі і правёў некаторыя паралелі.

Будучы гісторыкам па адукацыі, Прэзідэнт нагадаў пра лідара Мангольскай імперыі Чынгісхана, які змагаўся за краіну і абараняў сваіх людзей. "Яны гінулі на полі бою тысячамі. Але калі нехта смеў пакрыўдзіць яго воіна, ён мячом і агнём змятаў паселішчы і гэтых людзей, - заўважыў ён. - Што ж адбылося паміж Украінай і Расіяй? А тое ж самае".

Кіраўнік дзяржавы расказаў аб тым, як распаўся Савецкі Саюз, да чаго ў тым ліку прыклаў руку Захад на чале з ЗША. "Савецкі Саюз, з якім вы (Манголія. - Заўвага БЕЛТА) супрацоўнічалі. І нічога дрэннага ніхто пра яго не гаворыць. Тыя, хто помніць гэта супрацоўніцтва. Усякія былі часы, але ў цэлым гэта было добрае супрацоўніцтва", - заўважыў беларускі лідар.

Пасля развалу СССР была дамоўленасць, што ніякага сілавога блока Захад не будзе пашыраць да беларускіх і расійскіх граніц. Але адбылося роўна наадварот - ва Украіне пачалі ствараць плацдарм для нападзення на Беларусь і Расію, пачалі ўводзіць санкцыі.

"І першымі, хто супраць нас увёў санкцыі, была Украіна. Наша родная Украіна. Мае карані там закапаны. За што? Захад загадаў - увялі санкцыі супраць нас, - заўважыў кіраўнік дзяржавы. - Мы іх не атакавалі, мы на іх не нападалі, мы ім не загадвалі, як жыць".

Прадаўжаючы гістарычную паралель з тым, як Чынгісхан абараняў свой народ, кіраўнік дзяржавы нагадаў, як ва Украіне, ужо ў сучасным свеце, пачалі спальваць людзей у дамах. "Паглядзіце: Адэса, як там спальвалі рускіх людзей. Грамадства расійскае пачало націскаць на Прэзідэнта Пуціна і на ўладу: "Вы іх павінны абараніць! Паралель. Пуцін абараніў сваіх людзей там", - сказаў Аляксандр Лукашэнка.

Больш таго, у Мінску ў 2015 годзе прайшлі перагаворы ў Нармандскім фармаце, і былі заключаны добрыя дамоўленасці. Аднак яны не былі выкананы ўкраінскім бокам, а Захад заявіў, што гэта быў проста такі ход, каб даць час узброіцца супраць Расіі.

"Дык як жа Расія павінна была сябе паводзіць? Чаму манголы сёння, маючы паралель з Чынгісханам, перад якім вы схіляецеся (і я Прэзідэнта падтрымаў - гэта вялікая старонка вашай вялікай гісторыі, вы ёю ганарыцеся), асуджаюць Расію? А тым больш Беларусь, якая выступіла гарантам мірных перагавораў?" - заўважыў Прэзідэнт.

Аляксандр Лукашэнка таксама нагадаў, як пасля пачатку СВА і некалькіх раўндаў мірных перагавораў, у тым ліку ў Беларусі, былі парафіраваны мірныя пагадненні. Аднак па патрабаванні Захаду яны былі адхілены, і Захад жа сёння не дае спыніць процістаянне.

"Расіяне не хочуць гэтай вайны. Я гэта добра ведаю. Чаму не сесці за стол перагавораў? Чаму не дамовіцца? Амерыканцы хочуць утапіць Расію ў гэтым процідзеянні і вайне з Украінай: "Ваюй з Украінай, а мы ў гэты час паасобку разбяромся з Кітаем тут. Вось у чым сутнасць іх палітыкі. Таму я хацеў бы, каб у Манголіі гэта разумелі. Каб вы слухалі не толькі тое, што амерыканцы і заходнікі расказваюць, а як на самай справе адбываецца", - заявіў беларускі лідар.

Больш таго, ён падкрэсліў, што Расія для Беларусі - гэта братэрская саюзная краіна, з якой ёсць сумесная ваенная групоўка. "Гэта нашы самыя блізкія браты. Мы думаем і размаўляем на адной мове. Таму згодна з усімі юрыдычна падпісанымі дагаворамі я дзейнічаў. Што, заходнікі, амерыканцы гэтага не ведалі? Ведалі. Але я не хачу, каб гінулі людзі. І мы робім і будзем рабіць усё для таго, каб там быў мір. Калі амерыканцы пойдуць на тое, каб там быў мір, ён заўтра будзе. Але ім гэтага не трэба. Таму разбярыцеся, хто тут вінаваты і на чыім баку праўда", - рэзюмаваў Аляксандр Лукашэнка.-0-
Падпісвайцеся на нас у
Twitter
Топ-навіны
Свежыя навіны Беларусі