11 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка прысвеціць рабочую паездку ў Талачынскі раён Віцебскай вобласці тэме меліярацыі, паведамляе БЕЛТА.
Кіраўнік дзяржавы наведае ААТ "Амкадор-КЭЗ". Прадпрыемства з'яўляецца адзіным у Беларусі вытворцам меліярацыйных машын і аднакаўшовых гідраўлічных экскаватараў на гусенічным і колавым ходзе, а таксама траншэекапальнікаў. Завод таксама вырабляе бульдозеры, тэлескапічныя пагрузчыкі, ачышчальнікі каналаў і касілкі.
Чакаецца, што ў развіццё тэмы Аляксандр Лукашэнка прыме ўдзел у пленарным пасяджэнні рэспубліканскай семінар-нарады па пытаннях аднаўлення і выкарыстання ў Беларусі меліярацыйных зямель.
Аляксандр Лукашэнка ўжо не раз абазначаў важнасць работ па меліярацыі. Напрыклад, роўна год таму гэта тэма гучала на нарадзе з кіраўніцтвам Савета Міністраў, дзе Прэзідэнт паставіў перад аграрным сектарам стратэгічныя і тактычныя задачы.
Адной з такіх стратэгічных задач якраз і з'яўляецца меліярацыя. "Неадкладна трэба пачынаць фронтам проста. Гэта найважнейшая ў сельскай гаспадарцы работа. Захаванне ўрадлівасці зямель і наогул захаванне зямель - гэта святы абавязак дзяржавы, - падкрэсліў беларускі лідар. - Трэба вызначыць за зіму ўсе крыніцы фінансавання. Гэта не чыстая меліярацыя, а аднаўленне таго, што не рабілі гадамі, дзесяцігоддзямі. Каналы вырылі, дрэнаж палажылі і забылі. 60 гадоў прайшло, і прырода пачала адваёўваць гэтыя землі".
"Трэба пачынаць займацца гэтай работай па-дзяржаўнаму. Губляем тысячы гектараў урадлівых зямель па краіне", - падкрэсліў Аляксандр Лукашэнка.
Да гэтага пытання Прэзідэнт вярнуўся і ў чэрвені бягучага года ў ходзе рабочай паездкі ў Аршанскі раён Віцебскай вобласці. "Вельмі вялікая праблема. Асобна трэба нам пагаварыць па меліярацыі. Важнейшае пытанне", - сказаў ён.
На прадпрыемстве ў Талачынскім раёне Прэзідэнту даложаць аб стане і перспектывах развіцця ААТ "АМКАДОР", забеспячэнні пастаўкі тэхнікі для патрэб меліярацыі ў поўным аб'ёме, паляпшэнні яе сэрвіснага і гарантыйнага абслугоўвання.
Кіраўнік дзяржавы азнаёміцца з арганізацыяй вытворчасці выпускаемай прадукцыі, агледзіць выстаўку машын, асноўных вузлоў і камплектуючых, створаных у рамках праграмы па імпартазамяшчэнні.
ААТ "Амкадор-КЭЗ" стала часткай ААТ "АМКАДОР" у снежні 2013 года, калі кіруючая кампанія холдынга набыла 91,85 працэнта акцый ААТ "Коханаўскі экскаватарны завод". Уключэнне завода ў склад холдынга азнаменавала новы этап у дзейнасці прадпрыемства.
Пасля ўступлення ў склад холдынга завод быў перайменаваны ў ААТ "Амкадор-КЭЗ".
У 2017 годзе на прадпрыемстве запушчана поўнамаштабная мадэрнізацыя, якая завершана ў 2022 годзе.
Сёння ААТ "Амкадор-КЭЗ" мадэрнізаванае прадпрыемства поўнага цыкла вытворчасці, якое дынамічна развіваецца. Тэхніка прадпрыемства працуе на тэрыторыі шэрага краін блізкага і далёкага замежжа.-0-
