15 студзеня, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка назначыў Аляксея Аўраменку міністрам транспарту і камунікацый, перадае карэспандэнт БЕЛТА.
Кіраўнік дзяржавы адзначыў важнасць транспартнай сферы і звярнуў увагу, што пэўныя праблемы, якія неабходна вырашаць, ёсць у гэтым напрамку. "Нягледзячы на тое, што Анатоль Сівак (старшыня Мінгарвыканкама, а раней міністр транспарту і камунікацый. - Заўвага БЕЛТА) пайшоў на такую пасаду гарачую, вельмі важную для краіны, не трэба думаць, што ў вашым міністэрстве няма праблем. Міністэрства вельмі сур'ёзнае, вялікае і разнапланавае. Там усе віды транспарту. Пачынаючы ад паветранага і заканчваючы водным. Таму шмат праблем, якія трэба вырашаць, - сказаў Аляксандр Лукашэнка. - Я ўжо гаварыў прадстаўнікам мясцовай вертыкалі, што ў нас два гады будуць няпростыя. І паколькі мы краіна транзітная, ад вас многае залежыць".
Асобна Прэзідэнт звярнуў увагу на водны транспарт, даручыўшы сур'ёзна заняцца гэтым напрамкам і вызначыцца, у якой частцы такі транспарт патрэбны ў Беларусі, а ў якой, наадварот, не патрэбны або вельмі затратны. "Трэба ўсе гэтыя пытанні праштудзіраваць і гэтак жа, як па Міністэрстве энергетыкі, прарэвізаваць Міністэрства транспарту. Паглядзець і на структуру, і на кадры, на ўсе пытанні", - заявіў кіраўнік дзяржавы.
Аляксей Мікалаевіч Аўраменка нарадзіўся 11 мая 1977 года ў Мінску. У 1999 годзе скончыў Беларускую дзяржаўную політэхнічную акадэмію, у 2010 годзе - Акадэмію кіравання пры Прэзідэнце Беларусі.
У 1999-2000 гадах працаваў майстрам дарожна-будаўнічага ўпраўлення нумар 43 РУП "Будаўніча-мантажны трэст нумар 8", з 2000 па 2001 год - галоўным спецыялістам аддзела ўтрымання дарожнай сеткі Камітэта па аўтамабільных дарогах пры Міністэрстве транспарту і камунікацый.
У 2001-2006 гадах быў галоўным спецыялістам упраўлення ўтрымання дарожнай сеткі Дэпартамента "Белаўтадар" Міністэрства транспарту і камунікацый.
З 2006 па 2013 год займаў пасады галоўнага спецыяліста, намесніка начальніка і начальніка ўпраўлення транспарту, сувязі і інфарматызацыі Апарату Савета Міністраў Беларусі. Пасля чаго быў назначаны намеснікам міністра транспарту і камунікацый Беларусі.
З 2016 года працаваў першым намеснікам міністра транспарту і камунікацый.-0-
