29 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка запатрабаваў навядзення поўнага парадку ў вёсцы. Аб гэтым кіраўнік дзяржавы заявіў сёння на нарадзе аб сітуацыі ў сферы АПК, на якой абмяркоўваўся бягучы стан спраў, праблемныя пытанні і шляхі іх вырашэння, перадае карэспандэнт БЕЛТА.
На нарадзе было адзначана, што ў бягучых умовах, асабліва на фоне пандэміі і турбулентнасці на сусветным харчовым рынку, беларускі сектар АПК змог не толькі забяспечыць харчовую бяспеку краіны, але і ўнесці значны ўклад у развіццё эканомікі і забяспечыць экспартны складнік.
Тым не менш Аляксандр Лукашэнка ўказаў на шэраг праблемных пытанняў, якія неабходна вырашыць у бліжэйшы час. Ён падзяліўся з удзельнікамі нарады сваімі назіраннямі па выніках нядаўняй паездкі ў чарнобыльскія раёны, па дарозе ў якія Аляксандр Лукашэнка з борта верталёта мог ацаніць сітуацыю на сельгасземлях і ў больш шырокім плане.
"Катэгарычна настойваю на актывізацыі меліярацыі. Усё павінна быць накіравана на гэта. Мы губляем вялізныя плошчы, тысячы гектараў. Яны пачалі зарастаць хмызняком. А заўтра з яго вырастуць нікому не патрэбныя дрэвы (лесу ў нас хапае, дай бог яго перапрацаваць). Меліярацыя, догляд зямель, павышэнне ўрадлівасці - гэта задача дзяржаўнай важнасці. Гэта наша задача. Таму я папрашу міністра і віцэ-прэм'ера заняцца гэтымі праблемамі", - сказаў Прэзідэнт.
Ён адзначыў, што для рэалізацыі гэтай задачы ў кожным раёне павінен быць спецыяльны атрад. "Меліярацыя - пытанне важнейшае для нас. У кожнай вобласці шырокім фронтам павінна ажыццяўляцца меліярацыя", - падкрэсліў беларускі лідар.
Аляксандр Лукашэнка звярнуў увагу, што размова не толькі пра навядзенне парадку на землях. Эфектыўнае іх выкарыстанне і ўключэнне ў абарот важныя для развіцця жывёлагадоўлі, што мае патрэбу ў кармавой базе.
Яшчэ адна праблема, на якую кіраўнік дзяржавы звярнуў увагу, - вялікая колькасць прысядзібных участкаў, якія пустуюць, і закінутых дамоў у некаторых вёсках. Ён паставіў задачу перад усёй вертыкаллю ўлады на працягу бягучага года аператыўна вырашыць адпаведныя пытанні - безгаспадарныя дамы трэба або прадаць, або знесці іх, а зямлю рэкультываваць і ўвесці ў сельгасабарот.
Разам з тым Аляксандр Лукашэнка адзначыў і пазітыўную тэндэнцыю: апошнім часам гараджане пачалі актыўна купляць пустуючыя ўчасткі і дамы ў сельскай мясцовасці.
Аналагічным чынам Аляксандр Лукашэнка запатрабаваў вырашыць праблему і са старымі будынкамі былых ферм, якія цяпер не выкарыстоўваюцца: "Мы пабудавалі жывёлагадоўчыя комплексы. Гэта дало нам магчымасць адысці амаль паўсюль ад вытворчых памяшканняў, якія на ладан дыхаюць і тэхналагічна не могуць забяспечыць вытворчасць. Інакш кажучы, мы кінулі старыя фермы і на дахах растуць дрэвы". На вырашэнне гэтай праблемы кіраўнік дзяржавы адвёў два-тры гады, падкрэсліўшы, што гэтыя аб'екты не павінны быць "помнікамі безгаспадарчасці", а вызваляемыя землі павінны выкарыстоўвацца пад патрэбы сельскай гаспадаркі. "Прыводзьце ўсё ў парадак!" - запатрабаваў Прэзідэнт.-0-
