28 сакавіка 2025, 11:25

Лукашэнку прадставілі дапрацаваны праект указа аб кантрольна-нагляднай дзейнасці

28 сакавіка, Мінск /Кар. БЕЛТА/. Прэзідэнту Беларусі Аляксандру Лукашэнку прадставілі дапрацаваны праект указа аб павышэнні эфектыўнасці кантрольна-нагляднай дзейнасці. Гэта стала тэмай нарады ў кіраўніка дзяржавы, перадае карэспандэнт БЕЛТА.

Гэта пытанне раней ужо абмяркоўвалася на ўзроўні кіраўніка дзяржавы на нарадзе ў маі мінулага года. Тады Аляксандр Лукашэнка даручыў дапрацаваць праект указа, каб дакумент быў зразумелы і зручны для выкарыстання. Ставілася таксама задача змяніць стыль і метады работы кантралюючых органаў, зрабіўшы акцэнт на павышэнні эфектыўнасці работы.

"Дамовіліся, што ўрад сумесна з аблвыканкамамі ўнясуць праект указа аб павышэнні эфектыўнасці такой дзейнасці. Першапачатковы варыянт у нас быў, дамовіліся дапрацаваць яго. Прынялі рашэнне перагледзець заканадаўства і падрыхтаваць асобны адзіны дакумент па гэтых пытаннях, а не ўносіць змяненні і дапаўненні ў дзеючыя нарматыўныя прававыя акты", - сказаў кіраўнік дзяржавы.

Адпаведны праект указа быў падрыхтаваны ўрадам і па даручэнні кіраўніка дзяржавы дадаткова вывучаны Камітэтам дзяржаўнага кантролю.

Аляксандр Лукашэнка на нарадзе вырашыў дасканала прааналізаваць прадстаўленыя прапановы, паставіўшы пад сумненне шэраг тэзісаў.

Напрыклад, прапануецца ўзмацніць прафілактычную ролю кантролю. "Я хацеў бы, каб аўтары гэтага пасылу растлумачылі, абапіраючыся на жыццё, на зямлю, як гэта - узмацніць прафілактычную ролю кантролю, - сказаў Прэзідэнт. - Па прынцыпе, як мне прапануюць, "лепш прадухіліць і выправіць памылкі, чым пакараць". Ну вядома ж. Толькі як?"

Сцвярджаецца таксама, што кантрольныя органы павінны працаваць на апярэджанне, чаго Аляксандр Лукашэнка не выключае. Аднак дыскусія вялася па шэрагу момантаў, якія датычацца прапаноў загадзя даводзіць інфармацыю да прадпрыемстваў аб тыповых парушэннях, выключэння залішняга ўмяшання ў дзейнасць нармальна працуючых прадпрыемстваў і дапамогі ім не дапускаць парушэнняў.

І тут кіраўнік дзяржавы звярнуў увагу на фармулёўкі аб "залішнім умяшанні" і "нармальна працуючых прадпрыемствах". Пытанне ў тым, як менавіта інтэрпрэтаваць гэтыя нормы, якія будуць наступствы ад рэалізацыі ўказа.

Тое ж самае датычыцца зніжэння праверачнай нагрузкі на бізнес. "Што вы, зноў перабралі з праверкамі, душыце бізнес?" - задаў пытанне кіраўнік дзяржавы.

"Не", - адказаў старшыня КДК Васіль Герасімаў.

"Ну вось бачыце, ён гаворыць, што няма нічога ненармальнага. Прапануюць "залатую сярэдзіну". Катэгарычна супраць. Ніякага згавору, ніякай залатой сярэдзіны быць не можа. Ёсць закон - яго трэба выконваць. У законе ўсё прапісана", - падкрэсліў Аляксандр Лукашэнка.

Вяртаючыся да тэмы прафілактыкі, кіраўнік дзяржавы падкрэсліў, што гэта не павінна быць нейкай дзяжурнай фразай. "І ці кантралюючыя органы павінны займацца гэтай прафілактыкай. Усе павінны гэтым займацца, мне здаецца. Ад Прэзідэнта, заканчваючы старшынёй сельскага савета. Мы ўсіх папярэджваем: красці нельга, падаткі трэба плаціць, прыбытак трэба атрымліваць, зарплату людзям трэба аддаваць", - адзначыў Прэзідэнт.

Кіраўнік дзяржавы яшчэ раз акцэнтаваў увагу на дакладнасці і адназначнасці фармулёвак, прывёўшы ў якасці прыкладу сферу цэнаўтварэння, у адносінах да якой урад працуе над выпрацоўкай формулы справядлівага цэнаўтварэння. Тут, адзначыў Аляксандр Лукашэнка, каменціруючы некаторыя прапановы, можа паўстаць пытанне, што менавіта лічыць сацыяльна значнымі таварамі і па якіх крытэрыях тую ці іншую прадукцыю адносіць да гэтай катэгорыі. "Калі мы старым шляхам пойдзем, то наўрад ці нешта выпрацуем", - заўважыў ён.

Асноўным дакладчыкам на нарадзе выступіў міністр па падатках і зборах Дзмітрый Кійко як кіраўнік галоўнага кантралюючага органа ва ўрадзе, які і рыхтаваў праект указа. Ён адзначыў, што ў аснову новага комплекснага дакумента закладзены нормы дзеючага заканадаўства ў частцы форм кантролю метадаў кантролю, узроўню назначэння праверак і іншых працэдур. "Гэтыя нормы сябе зарэкамендавалі. Яны даюць кантралюючым органам неабходны інструментарый, - сказаў міністр. - Пры гэтым формы кантролю і ўзроўні прыняцця рашэнняў выбудаваны так, каб выключыць залішняе ўмяшанне ў работу суб'ектаў".

Разам з тым прапануецца і ёсць шэраг навацый. У цэлым яны заключаюцца ў зрушэнні акцэнтаў у бок прафілактыкі правапарушэнняў, выяўлення прычын і ўмоў, якія могуць садзейнічаць учыненню правапарушэнняў. Паводле слоў Дзмітрыя Кійко, кантралюючыя органы і цяпер гэтым займаюцца, але гэта дзейнасць не рэгламентавана ў адзіным дакуменце па кантрольнай дзейнасці.

"Я не супраць прафілактыкі. Няхай гэта будзе запісана тысячу разоў. Толькі каб усё не зводзілася да прафілактыкі. Таму што гэта будзе пустата", - заўважыў Аляксандр Лукашэнка.

Ён, напрыклад, звярнуў увагу на прапанову аб увядзенні забароны на правядзенне выбарачных праверак добрасумленных суб'ектаў часцей за адзін раз у 5 гадоў. "Адразу пытанне: чаму ў 5 гадоў, а не ў 2 ці 3 гады, не ў 10? Што такое "добрасумленны"? Усе эканамісты сядзяць (удзельнікі нарады ў кіраўніка дзяржавы. - Заўвага БЕЛТА)", - заўважыў Прэзідэнт.

У гэтым плане кіраўнік дзяржавы звярнуў увагу і на магчымы карупцыйны складнік: "Дзякуючы сябрам, знаёмым усе практычна хутка стануць "добрасумленнымі". Правяраць няма каго будзе. А яны падаткі не плацілі і не будуць плаціць". "І, самае галоўнае, а чаму мы вышэйшай службовай асобе (размове пра старшыню Камітэта дзяржкантролю. - Заўвага БЕЛТА), які ўзначальвае самы высокі орган, забараняем самому вызначацца, дзе правяраць, дзе не правяраць", - паставіў пытанне Аляксандр Лукашэнка.

Дзмітрый Кійко растлумачыў, што добрасумленныя суб'екты павінны будуць адпавядаць пэўным патрабаванням па рабоце арганізацый, выплаце падаткаў і гэтак далей. Надзяліць правам зацвярджаць канкрэтны пералік такіх патрабаванняў прапануецца Савет Міністраў, КДК і Генпракуратуру. "Але калі ў кантралюючага органа будзе інфармацыя аб тым, што гэты суб'ект, нягледзячы на свой статус, учыняе правапарушэнні (а для гэтага дастаткова інструментарыю), у адносінах да яго можа быць назначана пазапланавая праверка", - сказаў міністр.

Прэзідэнт і тут прывёў контраргумент: "З аднаго боку, праверкі забараняюцца, але ёсць "але". Навошта пішам тое, што не будзе працаваць фактычна? Мы забаранілі, а гэта "але" будзе перакрэсліваць тое, што вы забаранілі".

Дзмітрый Кійко згадзіўся, што пэўны суб'ектывізм прысутнічае, але ўсё ж такі лічыць, што для суб'ектаў гаспадарання магчымасць меншай перыядычнасці праверак будзе плюсам.

Старшыня КДК Васіль Герасімаў на нарадзе таксама звярнуў увагу на шэраг нюансаў, апаніруючы дакладчыку ад урада. Напрыклад, ён акцэнтаваў увагу на прапанаванай норме аб тым, каб кантралюючыя органы выкладвалі ў інтэрнэце інфармацыю аб парушэннях. "Калі ўсе кантралюючыя і наглядныя органы заўтра пачнуць выкладваць інфармацыю аб парушэннях, то нашы суб'екты гаспадарання будуць самымі дрэннымі ў свеце", - адзначыў ён.

"Ці захочуць гэтыя суб'екты гаспадарання, каб гэта выкладвалася ў адкрытым доступе?" - падтрымаў выказаны тэзіс кіраўнік дзяржавы.

"Гэта ж дзелавая рэпутацыя", - пацвердзіў Васіль Герасімаў, адзначыўшы, што не павінна быць перагібаў.

Аляксандр Лукашэнка адзначыў, што павінны быць аналітычныя матэрыялы, дзе аналізуюцца тыя ці іншыя тыповыя правапарушэнні, але гэтай дзейнасцю кантралюючыя органы займаюцца і цяпер.

Васіль Герасімаў таксама не падтрымаў прапанову аб тым, што КДК з прыняццем указа ў цяперашняй яго форме быў бы абавязаны кіравацца растлумачэннямі з месцаў ад дзяржаўных органаў. Напрыклад, аб тым, як трэба выплачваць той ці іншы падатак. Пры тым што такія растлумачэнні могуць істотна розніцца і залежаць ад канкрэтнай трактоўкі. Такім чынам, гэтыя растлумачэнні з узроўню меркаванняў узводзяцца фактычна ў ранг закону. "Гэта прамая дарога да карупцыі. Калі кожная службовая асобва ў дзяржаве пачне падпісваць паперы суб'ектам гаспадарання, і мы абавязаны будзем гэтым кіравацца, будуць падпісваць усё, што трэба", - папярэдзіў аб рызыках старшыня КДК.

Звяртаючыся да распрацоўшчыкаў дакумента, Аляксандр Лукашэнка сказаў: "Трэба прапісаць адназначна. Ці наогул не пісаць. Калі гэта можа быць. Што гэта за ўказ такі... А так вы мне расказваеце, як вы гэта разумееце і як вы хацелі б гэта бачыць. Гэта "хацелкі" называецца".

Вынік абмеркавання - праект указа будзе дадаткова дапрацаваны па шэрагу пытанняў, якія былі ўзняты ў ходзе дыскусіі. Зацікаўленым дзяржорганам трэба знайсці кампраміс, перагледзець падыходы і выдаць дакумент належнай якасці. Гэта работа будзе арганізавана ў бліжэйшы час.-0-

Падпісвайцеся на нас у