22 снежня, Гомель /Кар. БЕЛТА/. Захваральнасць на каранавірус у Гомельскай вобласці знізілася каласальна. Аб гэтым заявіў намеснік старшыні Гомельскага аблвыканкама Уладзімір Прывалаў на сустрэчы Прэзідэнта Беларусі Аляксандра Лукашэнкі з абласным актывам, перадае карэспандэнт БЕЛТА.
Паводле слоў Уладзіміра Прывалава, у вобласці выбудавана эфектыўная сістэма аховы здароўя, нядаўна былі рэканструяваны некалькі ўстаноў аховы здароўя, прадаўжаецца мадэрнізацыя бальніц і паліклінік. Да верасня 2022 года плануецца дабудаваць бальніцу хуткай медыцынскай дапамогі, на яе адкрыццё запрасілі і Прэзідэнта.
Гаворачы аб эпідэміялагічнай сітуацыі, намеснік старшыні аблвыканкама адзначыў, што захваральнасць на каранавірус знізілася каласальна. "Мы сёння маем 23 працэнты да ўзроўню гэтай хвалі", - звярнуў ён увагу. Больш за палову жыхароў вобласці прышчэплены першым кампанентам вакцыны ад COVID-19.
"Тая праблема, з якой мы сутыкнуліся, паказвае нам сёння і рэзервы, дзе трэба сканцэнтраваць увагу", - дадаў Уладзімір Прывалаў.
"Асаблівасць нашай сістэмы барацьбы з кавідам у тым, што ў нас вірусолагі і спецыялісты ў гэтай сферы хворых не лечаць. У нас вірусолагі па бальніцах паехалі і навучылі звычайных урачоў лячыць гэту заразу. Калі б мы зрабілі стаўку толькі на вірусолагаў (а іх жа ў краіне няшмат), мы ніколі не справіліся б з лячэннем. Кажуць, дзякуй урачам за тое, што лечаць. Не, дзякуй урачам за тое, што навучыліся лячыць кавід. Яны за кароткі перыяд часу навучыліся лячыць хворых", - звярнуў увагу Аляксандр Лукашэнка.
Прэзідэнт таксама заявіў, што Беларусі ўдалося справіцца з цяжкімі перыядамі пандэміі, як ніводнай іншай дзяржаве. Ён канстатаваў, што ў заходніх краінах сістэма аховы здароўя не спраўляецца з наплывам хворых, з-за чаго там высокая смяротнасць ад каранавіруса. "Прыватная ўласнасць у ахове здароўя да гэтага прывяла: ёсць грошы - лечым, няма грошай - да пабачэння, - адзначыў Аляксандр Лукашэнка. - Хіба ў нас такое было нават у самыя складаныя часы?"-0-
