ДЗЯРЖОРГАНЫДЗЯРЖОРГАНЫ
Флаг Аўторак, 7 лютага 2023
Мінск -3°C
Усе навіны
Усе навіны
Прэзідэнт
24 студзеня 2023, 15:17

Лукашэнка запатрабаваў прывесці ў парадак дарогі ў краіне, і асабліва ў Мінску

Фота з архіва
Фота з архіва

24 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка звярнуў увагу на дрэнную якасць дарог у Мінску і запатрабаваў ад адказных асоб аператыўна вырашыць гэту праблему. Адпаведную заяву кіраўнік дзяржавы зрабіў на нарадзе аб грамадска-палітычнай абстаноўцы і стане злачыннасці ў краіне, перадае карэспандэнт БЕЛТА.

Паводле слоў Прэзідэнта, у яго адрас апошнім часам паступаюць скаргі наконт дарожнага пакрыцця. "Людзі скардзяцца на дарогі, асабліва ў Мінску. Але гэта актуальна для ўсіх", - заўважыў Аляксандр Лукашэнка.

На стан дарог, зразумела, аказваюць уплыў складаныя кліматычныя ўмовы, але ёсць і іншыя фактары, на якія можна і трэба ўплываць. "Людзі павінны разумець, што зіма ў нас наогул вельмі дрэнная - то мароз мінус 20-25, потым дождж пайшоў, то зноў пачне падмарожваць, - сказаў кіраўнік дзяржавы. - Вядома, наш асфальт пачынае крышыцца. Зразумела, што недзе дарожнікі недагледзелі і гэтак далей... Але гэта не апраўдвае і таго, што ў нас у Мінску".

"Я даручыў учора службе бяспекі і міліцыі праехаць па ўсіх дарогах. Вывад адзін: на тройку, - звярнуў увагу кіраўнік дзяржавы. - За суткі людзі зрабілі выснову: цярпіма, але працаваць трэба".

У сувязі з гэтым Аляксандр Лукашэнка даў даручэнне старшыні Савета Рэспублікі Наталлі Качанавай і міністру ўнутраных спраў Івану Кубракову разабрацца з праблемай і прывесці ў парадак дарогі. "Што мяне здзівіла: у вас у горадзе (Мінску. - Заўвага БЕЛТА) паўсотні машын, нават больш, якія ў гэты перыяд павінны працаваць з ямачным рамонтам. Паўсотні! За суткі, калі арганізаваць дастойна, можна навесці парадак на дарогах, - падкрэсліў Прэзідэнт. - Калі ласка, разам разбярыцеся з Кухаравым (Уладзімірам Кухаравым, старшынёй Мінгарвыканкама. - Заўвага БЕЛТА) і гарвыканкамам. Будзе дрэнна, калі я пачну разбірацца".

"Наталля Іванаўна, вы не рабіце справаздачу перада мной. Вы зрабіце так, каб другі раз хлопцы са службы бяспекі і ДАІ, якім я даручу, праехалі і сказалі: "Так, сапраўды шмат зроблена". Трэба працаваць у гэтым напрамку", - дадаў Прэзідэнт.

Падагульняючы ўсё сказанае, кіраўнік дзяржавы падкрэсліў: "Дарогі і ўсё, што звязана з дарогамі, асабліва ў Мінску і буйных гарадах, ды ўсюды гэтым трэба займацца. Але не проста - ідзі яму зараўнуй. Не. Павінен быць план, павінна быць задача на суткі, па начах трэба працаваць, калі няма руху ў асноўным, недзе днём, калі рух не інтэнсіўны. Трэба гэта прыводзіць у парадак".

Аляксандр Лукашэнка таксама паставіў задачу перад мясцовымі ўладамі пры неабходнасці арганізаваць работу па ачыстцы вуліц ад снегу з прыцягненнем жыхароў адпаведных раёнаў. "Чысціць не ўлада павінна. Людзі павінны гэта рабіць. Але арганізаваць мы павінны. Людзі жывуць у кватэры. Няўжо лапаты, скрабкі яны будуць у кватэры трымаць? Значыць, трэба арганізаваць. Гэта вы павінны зрабіць, органы ўлады", - сказаў Прэзідэнт.-Э-

Падпісвайцеся на нас у
Twitter
Топ-навіны
З НАМІ НАЙБОЛЬШ ЦІКАВА
Свежыя навіны Беларусі