23 сакавіка, Мінскі раён /Кар. БЕЛТА/. Прэзідэнт Беларусі Аляксандр Лукашэнка сёння ў час наведвання Мінскага вытворчага гарбарнага аб'яднання запатрабаваў навесці парадак на незадзейнічанай тэрыторыі завода, перадае карэспандэнт БЕЛТА.
Кіраўнік дзяржавы спытаў у кіраўніцтва прадпрыемства, якія плошчы займае завод. Паводле слоў генеральнага дырэктара Вольгі Паліціка, прадпрыемства размясцілася на тэрыторыі 27 га, аднак сёння палавіна тэрыторыі незадзейнічана. Там стаяць пустыя і непрыдатныя будынкі.
Аляксандр Лукашэнка пацікавіўся ў губернатара Мінскай вобласці Аляксандра Турчына і ў свайго памочніка Аляксандра Косінца, чаму да гэтага часу не вырашана пытанне з гэтымі тэрыторыямі. Бо задача ставілася яшчэ ў 2014 годзе ў час мінулага наведвання завода Прэзідэнтам. "Чаму не было вырашана гэта пытанне?" - спытаў кіраўнік дзяржавы.
Меркаванні ў кіраўніцтва прадпрыемства і чыноўнікаў разышліся: адны выступаюць за знос будынкаў і аддачу зямель пад новыя вытворчасці, нехта лічыць, што старыя цэхі неабходна мадэрнізаваць і такім чынам пашырыць гарбарную вытворчасць. Але канчатковага рашэння няма.
Аляксандр Лукашэнка запатрабаваў разабрацца з гэтым пытаннем і навесці парадак на гэтай тэрыторыі, каб землі не прападалі.-0-