Лукашэнка заявіў аб імкненні зрабіць Шклоўскі раён узорным для капіравання па ўсёй краіне

8 ліпеня, Мінск /Кар. БЕЛТА/. Прэзідэнт Беларусі Аляксандр Лукашэнка пры разглядзе кадравых пытанняў заявіў аб імкненні зрабіць Шклоўскі раён узорным для капіравання па ўсёй краіне, перадае карэспандэнт БЕЛТА.

"Ведаючы добра Шклоўскі раён, я хачу стварыць адносна ўзорны раён для капіравання па ўсёй краіне. Гэта вельмі важна", - падкрэсліў кіраўнік дзяржавы.
Аляксандр Лукашэнка звярнуў увагу, што ў гэтым раёне адноўлены ўсе ключавыя, неабходныя для развіцця сельскай гаспадаркі на мясцовым узроўні структуры, у тым ліку райаграсэрвіс, сельгасхімія, перасовачныя механізаваныя калоны (ПМК), ільнонасенняводчая станцыя. "Гэта ўсё нам трэба. Усё гэта адноўлена. Па краіне ў рознай ступені гэта рэабілітавана і адноўлена, - сказаў кіраўнік дзяржавы. - Вось у Шклове мы гэта ўсё, успамінаючы мінулае, аднавілі на сур'ёзным, высокім узроўні. Таму Шклоўскі раён павінен быць узорна-паказальным у гэтым плане. Мне так хацелася б".

Што датычыцца райаграсэрвісу ў Шклове, ён больш блізкі да таго ўзору, які падыходзіць для тыражавання па раёнах краіны, чым, напрыклад, аналагічная структура ў Мазырскім раёне - "Мазыртэхсэрвіс", на базе якога ў красавіку гэтага года прайшоў семінар-нарада з удзелам кіраўніка дзяржавы. "Гэта прадпрыемства (больш высокага ўзроўню. - Заўвага БЕЛТА), якое ўжо і абслугоўвае, і выпускае многія ўзоры сельскагаспадарчай і іншай тэхнікі. А вось Шклоўскі райаграсэрвіс - гэта якраз тое, што ёсць у кожным раёне", - сказаў Аляксандр Лукашэнка.

Акрамя таго, у рабоце райаграсэрвісаў плануецца актыўны ўдзел вядучых айчынных вытворцаў. "Гэта сэрвісныя цэнтры для нашых прадпрыемстваў. Прадстаўнікі МТЗ, МАЗа, маторнага завода - усіх заводаў, якія ў нас існуюць у краіне, - няхай упіраюцца таксама разам з гэтымі 118 раёнамі, упіраюцца і працуюць", - адзначыў Прэзідэнт.

Важнасць такіх структур для паспяховага развіцця кожнага раёна цяжка пераацаніць, упэўнены кіраўнік дзяржавы. "Вы добра разумееце, што такое аграсэрвіс у такіх раёнах. Без гэтага ніякага развіцця раёна быць не можа, - сказаў Аляксандр Лукашэнка, звяртаючыся да назначаных чыноўнікаў. - Я наогул не ўяўляю работу старшыні райвыканкама, калі ў яго няма камбікормавага завода, няма сельскагаспадарчага абслуговага прадпрыемства, сельгасхіміі, будаўнічай нейкай галіны... Што гэта за старшыня райвыканкама, калі ў яго няма гэтых інструментаў?"
У гэтым сэнсе Шклоўскі раён набліжаецца да таго, што можна назваць узорам. Акрамя абноўленых райаграсэрвісу і камбікормавага завода, там у хуткім часе з'явіцца сучасны малакаперапрацоўчы завод магутнасцю 300 тон за суткі, будаўніцтва якога павінна быць завершана ў лістападзе гэтага года. Для аснашчэння гэтага прадпрыемства на перадавым узроўні прыцягваліся ў тым ліку іншыя ўдзельнікі аграбізнесу, якія ўжо рэалізаваліся і добра валодаюць гэтымі тэхналогіямі. Для новага малаказавода ўжо вызначаны сыравінныя зоны. Пры неабходнасці дзяржава гатова іх пашырыць за кошт сельгаспрадпрыемстваў Аршанскага раёна. "Але, гавораць, там хапае (пакуль выдзеленых сыравінных зон. - Заўвага БЕЛТА). Трэба больш вырабляць, асабліва на шклоўскіх землях. Гэта і Круглае, і Бялынічы побач, іншыя раёны: Магілёўскі, Мсціслаўскі, Горацкі. Падключайце. Але каб гэта прадпрыемства было загружана", - даручыў Прэзідэнт.

Аляксандр Лукашэнка таксама нагадаў аб нарадзе па развіцці Магілёўскай вобласці, якая адбылася напярэдадні, і прынятым па выніках рашэнні перадаць з рэспубліканскай уласнасці акцыі аграхолдынга Кіраўніцтва справамі Прэзідэнта ў Шклоўскім раёне ў камунальную ўласнасць. "Вам перадаём усе прадпрыемствы: і камбікормавы завод (як цацка), і "хімія" (сельгасхімія. - Заўвага БЕЛТА), сельгастэхніка, ПМК - усё-ўсё ёсць для таго, каб там працаваць, - звярнуў увагу Прэзідэнт. - У Шклоўскім раёне створана ўсё для таго, каб працаваць".

Таму, як падкрэсліў Аляксандр Лукашэнка, і патрабаванне за вынік з новага кіраўніка раёна будзе строгае. А ўвага з боку Прэзідэнта да гэтых тэрыторый захаваецца асаблівая: "Там нічога не заржавее. Колькі я буду працаваць, столькі я ўвагу буду ўдзяляць".

"Я там часта бываю, і працаваў (раней. - Заўвага БЕЛТА), ведаю кожны квадратны метр. Гэта будзе няпроста (кіраваць раёнам, які знаходзіцца ў пастаянным полі зроку кіраўніка дзяржавы. - Заўвага БЕЛТА). Гэта будзе вельмі няпроста, Міхаіл Леанідавіч, - папярэдзіў Прэзідэнт. - І тое, што рызыкнулі туды пайсці - я вам вельмі ўдзячны".

Разам з тым Міхаілу Крыцкаму было ўказана на асобныя недахопы ў час яго мінулай работы ў Шклоўскім раёне на розных пасадах у сферы сельскай гаспадаркі. Выпраўляць іх даручана яму ва ўзаемадзеянні з кіраўніком Адміністрацыі Прэзідэнта, упаўнаважаным прадстаўніком Прэзідэнта ў Магілёўскай вобласці Дзмітрыем Крутым і новым памочнікам Прэзідэнта - інспектарам па Магілёўскай вобласці Надзеяй Каткавец, якая, дарэчы, таксама працавала ў Шклоўскім раёне і вельмі добра яго ведае. 

"Вы з Надзеяй Мікалаеўнай там разбярацеся, дрэнна ці добра (спрацаваў раней. - Заўвага БЕЛТА), каб яна табе паказала ўсе твае касякі, - сказаў Аляксандр Лукашэнка. - Таму едзь у Шклоў і выпраўляй. У дапамогу табе адзін кантралёр, другі, які спаць не дасць. І ты ж май на ўвазе: за ўсё гэта адказваць трэба".  
Міхаіл Крыцкі ў размове з журналістамі запэўніў, што пастаўленыя Прэзідэнтам задачы ў адносінах да Шклоўскага раёна будуць выкананы. "Упор будзе зроблены ў першую чаргу на выкананне тэхналогій і дысцыпліны, а таксама на кадравы патэнцыял раёна, таму што кадры вырашаюць усё. Пастаўленыя задачы будуць выкананы", - падкрэсліў ён.

Адказваючы на ​​пытанне аб сваіх ключавых якасцях як кіраўніка, Міхаіл Крыцкі назваў сумленны падыход да людзей і добрасумленнае стаўленне да працы. "Такое ж патрабаванне я буду ставіць перад сваімі людзьмі", - дадаў ён.
Раней Міхаіл Крыцкі кіраваў Бабруйскім раёнам, але і шклоўская зямля для яго не чужая. "Я прапрацаваў там даволі вялікі адрэзак часу, таму я добра ведаю раён", - адзначыў ён.-0-