19 снежня, Мінск /Кар. БЕЛТА/. Цяпер фактычна вызначаецца будучыня беларускага і расійскага народаў. Аб гэтым кіраўнік дзяржавы Аляксандр Лукашэнка заявіў журналістам па выніках перагавораў у Мінску з Прэзідэнтам Расіі Уладзімірам Пуціным, перадае карэспандэнт БЕЛТА.
Акцэнт быў зроблены на стратэгічных напрамках, перш за ўсё ў сферы эканомікі. Традыцыйна шмат увагі ўдзялілі знешнепалітычнаму парадку дня. "Адыходзячы год за ўсю трыццацігадовую постсавецкую гісторыю сапраўды стаў рэкордным па колькасці і інтэнсіўнасці кантактаў на ўсіх узроўнях. Але гэта аб'ектыўна: сітуацыя ў свеце імкліва мяняецца, і гэтыя перамены па глыбіні і маштабах без усялякага перабольшання маюць сапраўды лёсавызначальны характар", - сказаў кіраўнік дзяржавы.
"Фактычна вызначаецца будучыня беларускага і расійскага народаў. Рэальнасць такая, і тут няма ні кроплі пафасу. Сёння можна адназначна канстатаваць: разам мы змаглі не толькі выстаяць, але і знайсці магчымасці для развіцця нашых эканомік. Прытым нечакана для ўсіх. І перш за ўсё тых, хто ствараў нам складанасці", - падкрэсліў беларускі лідар.
Аляксандр Лукашэнка выказаў удзячнасць Уладзіміру Пуціну за цёплую, глыбокую, энергічную і канструктыўную размову, якая адбылася з удзелам членаў урадаў Беларусі і Расіі. "Дзякуй вам за вельмі плённую сустрэчу", - сказаў ён.-0-
