Сцяг Нядзеля, 19 мая 2024
Усе навіны
Усе навіны
Прэзідэнт
11 сакавіка 2024, 12:59

Лукашэнка ўзгадніў кадравыя назначэнні ў кіраўніцтве Мінаблвыканкама і двух раёнаў

11 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка, прымаючы кадравыя рашэнні 11 сакавіка, узгадніў назначэнні ў кіраўніцтве Мінскага аблвыканкама і двух райвыканкамаў, перадае карэспандэнт БЕЛТА.

Першым намеснікам старшыні Мінскага аблвыканкама ўзгоднены Васіль Сысоеў, які дагэтуль працаваў тут жа, узначальваў камітэт па сельскай гаспадарцы і харчаванні.

Кіраваць Бярэзінскім райвыканкамам будзе Андрэй Сакалоўскі, які дагэтуль з'яўляўся намеснікам старшыні гэтага раёна. А Карэліцкі райвыканкам узначаліць Андрэй Гардзей, які працаваў першым намеснікам старшыні - начальнікам упраўлення сельскай гаспадаркі і харчавання Ашмянскага райвыканкама.

Пры разглядзе кадравых пытанняў Аляксандр Лукашэнка звярнуўся да першага намесніка кіраўніка Адміністрацыі Прэзідэнта Максіма Рыжанкова, які прадстаўляў кандыдатаў на пасады кіраўнікоў мясцовай вертыкалі, і спытаў, якія прычыны адыходу з работы іх папярэднікаў. Размова зайшла, у прыватнасці, пра Генадзя Шатуева, які вызвалены ад пасады кіраўніка Карэліцкага райвыканкама. Як растлумачыў Максім Рыжанкоў, прычынай стала зніжэнне паказчыкаў сацыяльна-эканамічнага развіцця раёна. У той жа час чыноўніку была прапанавана работа памочніка першага намесніка старшыні Гродзенскага аблвыканкама, які курыруе вёску.

"Як гэта разумець? Калі чалавек не справіўся з работай, праваліў фактычна... Мякка гаворым "праваліў", і мы яго падымаем у вобласць? - крытычна заўважыў наконт такой прапановы Прэзідэнт. - Вы разбярыцеся, так быць не павінна. Людзі гэта бачаць. Так быць не павінна. Людзі менавіта так і ацэняць. Скажуць, вось яго забралі ў Гродна - так людзі разважаюць. Калі чалавек выклаўся так, што далей няма куды, заслужыў гэта - іншая справа. Але я сумняваюся ў гэтым".

У сувязі з патрабаваннем кіраўніка дзяржавы сітуацыя будзе дадаткова вывучана, запэўніў Максім Рыжанкоў.

"Трэба гэтыя пытанні вельмі сур'ёзна разглядаць. Каб тут была пэўная лінія і людзі нас разумелі", - рэзюмаваў Аляксандр Лукашэнка.-0-

Падпісвайцеся на нас у
Twitter
Топ-навіны
Свежыя навіны Беларусі