14 сакавіка, Масква /Кар. БЕЛТА/. Прэзідэнт Беларусі Аляксандр Лукашэнка ў пачатку свайго выступлення ў Савеце Федэрацыі ў ходзе афіцыйнага візіту ў Расію нагадаў аб сваім папярэднім выступленні перад расійскімі парламентарыямі чвэрць стагоддзя таму, перадае карэспандэнт БЕЛТА.
"Наша сустрэча яшчэ і сімвалічная. 25 гадоў таму напярэдадні падпісання Дагавора аб стварэнні Саюзнай дзяржавы, 27 кастрычніка 1999 года, я пабываў у Дзяржаўнай думе і выказаў сваю пазіцыю адносна гэтага падпісання. Тады дэпутаты вельмі горача падтрымалі нашу работу з першым Прэзідэнтам Расіі. Памятаю добра, як тады я, яшчэ "зялёны" Прэзідэнт, пераконваў вашых калег - вопытных парламентарыяў, людзей савецкай загартоўкі - у неабходнасці больш глыбокай інтэграцыі нашых краін. Было зусім няпроста. Меркаванні наконт гэтай ідэі ў палітычных колах як у вас, так і ў нас былі розныя, - сказаў Прэзідэнт. - Гэта ўсё яшчэ быў час ілюзій і моды на "нацыянальныя кватэры", свабодную рыначную эканоміку, ліберальныя каштоўнасці, заходнія прынцыпы пабудовы грамадства".
Як заявіў кіраўнік дзяржавы, у той час, нягледзячы на аб'яўленае завяршэнне халоднай вайны, Захад паслядоўна, па інерцыі ўжо рэалізоўваў сваю шматхадовую стратэгію развалу таго, што засталося ад СССР. "Але ўжо тады, праз восем гадоў пасля Белавежскіх пагадненняў, было відавочна, што аднаму і ў эканамічным, і ў палітычным плане выстаяць праблематычна. Практычна немагчыма. Нам тады стала гэта зразумела", - сказаў Прэзідэнт.-0-
Падпісвайцеся на нас у
