30 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка на сустрэчы з міністрам замежных спраў Расіі Сяргеем Лаўровым згадаў аб спробах Літвы закрыць транзіт грузаў у Калінінградскую вобласць Расіі, перадае карэспандэнт БЕЛТА.
"Ужо аб'явілі эканамічную вайну. Што такое транзіт закрыць? І ўсе крычаць пра нейкі Сувалкскі калідор. Слухайце, мы з вамі пра гэта не гаворым, а яны крычаць. Яны што, намякаюць?" - адзначыў кіраўнік дзяржавы.
Аляксандр Лукашэнка падкрэсліў, што ў Беларусі і Расіі дастаткова сіл і сродкаў для таго, каб даставіць грузы ў Калінінград. "Без усялякіх войнаў і напружанняў. Мы з Пуціным вельмі сур'ёзна абмяркоўвалі гэтыя пытанні", - сказаў ён.
Прэзідэнт у сувязі з гэтым адзначыў палітыку Літвы, якая ў пытанні санкцый "бяжыць наперадзе паравоза": "Спіхваюць увесь час на Еўрасаюз. Маўляў, гэта не мы, гэта Еўрасаюз прыняў рашэнне. Дык там прымаюцца рашэнні кансэнсусам. Калі вы бачылі, што гэта можа нашкодзіць Літве, ну вы не галасуйце за гэта і рашэнне прынята не будзе. Або прымуць з якімі-небудзь выключэннямі. Але вы ж бачыце, што яны наперадзе паравоза бягуць. І заўсёды крычаць: "Душы, цкуй!". І гэтак далей. Ва ўрон сваёй дзяржаве. Для мяне гэта нядзіўна, таму што я назіраю гэта пастаянна. І я бачу, хто там выступае за такія рэчы".-0-
