Сцяг Субота, 13 красавіка 2024
Усе навіны
Усе навіны
Прэзідэнт
08 студзеня 2024, 11:07

Лукашэнка ў свята Нараджэння Хрыстова наведаў храм Святога прарока Іаана Прадцечы

8 студзеня, Мінск /Кар. БЕЛТА/. Прэзідэнт Беларусі Аляксандр Лукашэнка 7 студзеня ў светлае свята Нараджэння Хрыстова наведаў храм Святога прарока Іаана Прадцечы, які размешчаны ў аграгарадку Шаршуны Мінскага раёна, паведамляе карэспандэнт БЕЛТА.

Па традыцыі кіраўнік дзяржавы запаліў у храме калядную свечку, паразмаўляў з прадстаўнікамі духавенства і прыхаджанамі.

Аляксандр Лукашэнка нагадаў, што ў 2020-м годзе, калі ён прыехаў на адкрыццё гэтай царквы, мясцовыя прыхаджане запрасілі яго яшчэ раз наведаць гэты храм. "Я паабяцаў, таму і прыехаў сёння да вас. Прыехаў для таго, каб з гэтага светлага добрага храма ад свайго імя павіншаваць усіх вас і ўсіх нашых беларусаў, нашых гасцей, усіх, хто мяне пачуе, з самым добрым, светлым святам - Нараджэннем Хрыстовым", - сказаў Прэзідэнт.

Кіраўнік дзяржавы падзякаваў Прадстаяцелю Беларускай праваслаўнай царквы Мітрапаліту Веніяміну і ўсім свяшчэннаслужыцелям за дзеянні, якія яны ажыццяўляюць у імя беларускага народа, дзяржавы, царквы, у імя жыцця беларусаў. "Яны ў цэлым робяць вельмі вялікую справу. Вядома, і ў гэты год ім давядзецца прыкласці нямала намаганняў для таго, каб Год якасці быў сапраўдным для кожнага чалавека. Але за тое, што нашы свяшчэннаслужыцелі робяць, яны заслугоўваюць павагі і ўдзячнасці", - падкрэсліў Аляксандр Лукашэнка.

Звяртаючыся да прыхаджан і жыхароў усёй Беларусі, кіраўнік дзяржавы пажадаў ім перш за ўсё здароўя, паколькі ўсяго астатняга можна дабіцца ўласнай працай. "Мазгоў у нас хапае. Людзей таксама хапае добрых і працавітых. Таму я вам жадаю здароўя, шчасця. І самае галоўнае - радасці вам ад вашых дзяцей. Няхай яны будуць заўсёды здаровыя і будуць заўсёды вам у радасць. З Нараджэннем Хрыстовым!" - сказаў Прэзідэнт.

Кіраўнік дзяржавы перадаў у дар храму абраз Божай Маці "Дзяржаўная". Работа выканана ў традыцыйным для беларускай школы іканапісу стылі, ва ўнікальнай тэхніцы васковай тэмперы.


Прэзідэнту ж быў падораны абраз свяціцеля Мікалая Цудатворца. Гэта адзін з найбольш шануемых святых, якога яшчэ пры жыцці празвалі Цудатворцам. Лічыцца, што і пасля смерці ён прадаўжае хадзіць па свеце і тварыць цуды.

Мітрапаліт Веніямін у сваю чаргу адзначыў, што свята Нараджэння Хрыстова з'яўляецца радаснай, урачыстай, але разам з тым таямнічай падзеяй у жыцці ўсяго чалавецтва. "Гасподзь дае людзям сваю вялікую і багатую ласку. Усяму чалавецтву. Ён прыйшоў для выратавання ўсяго роду чалавечага. Нам у Год якасці застаецца толькі звяртацца да гэтых дароў божых. Прыкладваць, вядома ж, сваю працу, клапаціцца, каб усё было якасна. І не толькі на ўзроўні прамысловасці, але і ў духоўнай сферы прыкласці свае намаганні, каб прыносіць добры плён", - сказаў ён.

У кастрычніку 2020 года Аляксандр Лукашэнка ўжо наведваў храм у аграгарадку Шаршуны адразу пасля яго адкрыцця і асвячэння. Гэта царква ўяўляе сабой будынак з двума купаламі, выкананы ў візантыйскім стылі. Адначасова ў ёй могуць знаходзіцца амаль 150 прыхаджан. Будаўніцтва храма пачалося ў сярэдзіне 2018 года, скончана ў другой палове 2020-га на сродкі вядомага ў Беларусі мецэната.

"Вельмі хачу, каб гэта месца было не проста святым, а было для вас шануемым, каб вы пастаянна тут бывалі", - сказаў тады прыхаджанам Аляксандр Лукашэнка.

Ён расказаў, што ў свой час асабіста зацвярджаў праект новага храма. "Мы хацелі менавіта тут, на ўзвышшы, свабодным месцы, пабудаваць гэты храм і дом для таго чалавека, які будзе тут жыць і працаваць, - адзначыў Прэзідэнт у кастрычніку 2020 года. - За апошнюю чвэрць стагоддзя ў краіне ўзведзена больш за паўтары тысячы такіх культавых будынкаў. Нас не будзе, а нашы дзеці будуць успамінаць, што мы зрабілі такія добрыя справы ў імя нашых дзяцей і нашых унукаў".

У віншаванні праваслаўным хрысціянам Беларусі кіраўнік дзяржавы падкрэсліў, што светлае свята  Нараджэння Хрыстова дорыць вернікам надзею на духоўнае выратаванне, вучыць бязмежнай любові і ахвярнасці ў імя бліжняга.

"Хрысціянскія спагада і клопат, прастата і добразычлівасць даўно сталі культурным здабыткам беларускага народа. Мы адкрываем сэрца тым, хто прыходзіць з мірам, і самі гатовы дзяліцца з тымі, хто мае ў гэтым патрэбу, хлебам і прытулкам", - гаворыцца ў віншаванні.-0-
Падпісвайцеся на нас у
Twitter
Топ-навіны
Свежыя навіны Беларусі