13 снежня, Мінск /Кар. БЕЛТА/. Прэзідэнт Беларусі Аляксандр Лукашэнка наведае сёння Беларускі дзяржаўны медыцынскі ўніверсітэт, паведамляе БЕЛТА.
У час наведвання ВНУ кіраўніку дзяржавы даложаць аб асноўных напрамках у галіне кадравай палітыкі і медыцынскай адукацыі. Размова таксама пойдзе пра стан, праблемы і перспектывы развіцця ўніверсітэта, яго ролю ў падрыхтоўцы медыцынскіх кадраў.
Плануецца, што асноўны час будзе ўдзелены размове са студэнтамі і выкладчыкамі. Пры гэтым мерапрыемства будзе трансліравацца таксама ў аўдыторыі і ВНУ краіны, якія ажыццяўляюць падрыхтоўку медыцынскіх кадраў. Гэта ў прыватнасці медыцынскія ўніверсітэты ў Віцебску, Гомелі і Гродне.
Беларускі дзяржаўны медыцынскі ўніверсітэт - вядучая і прызнаная на міжнародным узроўні ўстанова вышэйшай медыцынскай адукацыі Беларусі. Заснаваны ў 1921 годзе. Падрыхтоўка, павышэнне кваліфікацыі і перападрыхтоўка медыцынскіх кадраў ажыццяўляецца ва ўніверсітэце на 9 факультэтах.
У галіне міжнароднай дзейнасці з 2019 года сумесна з Міністэрствам адукацыі праводзіцца работа па акрэдытацыі ўніверсітэта ў Сусветнай федэрацыі медыцынскай адукацыі. Асвойваюцца новыя рынкі адукацыйных паслуг, адкрываюцца новыя сумесныя факультэты, прадаўжаецца работа па пацвярджэнні дыплома ўніверсітэта ў сістэмах адукацыі ЗША і Канады.
У сферы адукацыйнай дзейнасці праводзіцца работа па пашырэнні пераліку спецыяльнасцей, па якіх ажыццяўляецца навучанне на англійскай мове, і ўкараненні дыстанцыйнага навучання з мэтай прыцягнення большай колькасці замежных абітурыентаў. Таксама вядзецца работа па ўкараненні Міжнароднага стандарту медыцынскай адукацыі па сістэме USMLE (United States Medical Licensing Examination) у адукацыйны працэс на медыцынскім факультэце іншаземных навучэнцаў. Рэалізуюцца сумесныя праекты з Паркам высокіх тэхналогій у галіне ўдасканалення інфарматызацыі ўніверсітэта.-0-