26 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка азнаёміцца з работай ААТ "Мінскі механічны завод імя С.І.Вавілава - кіруючая кампанія холдынга "БелОМА", паведамляе БЕЛТА.
Кіраўніку дзяржавы даложаць аб фінансава-эканамічным стане холдынга, распрацоўках і перспектывах развіцця вытворчасці.
Беларускае оптыка-механічнае аб'яднанне (з 2011 г. - холдынг "БелОМА") - прызнаны лідар оптыка-электроннага прыборабудавання. Гісторыя холдынга "БелОМА" пачынаецца ў 1957 годзе з заснавання Мінскага механічнага завода імя С.І. Вавілава.
Цяпер гэта ўніверсальнае шматпрофільнае аб'яднанне, якое спецыялізуецца ў распрацоўцы, канструяванні і вытворчасці лазерных, оптыка-электронных і оптыка-механічных прыбораў і сістэм. Разам з прадукцыяй аптычнага профілю прадпрыемства выпускае кампаненты тармазных сістэм велікагрузных аўтамабіляў, бытавыя прыборы ўліку газу (у тым ліку з тэрмакампенсатарам, імпульсным выхадам, ультрагукавыя, з каналам бесправадной перадачы даных), ІЧ-выпраменьвальнікі (абагравальнікі) для агульнага і лакальнага абагравання памяшканняў, тавары народнага спажывання (электрасушылкі, электрасокавыціскалкі, электрасокавыціскалкі-шаткоўні) і шмат іншага.
Вытворчыя магутнасці прадпрыемства даюць магчымасць паспяхова вырабляць канкурэнтаздольную прадукцыю як для ўнутранага, так і для знешняга рынкаў. Інавацыйная прадукцыя холдынга "БелОМА" экспартуецца больш як у 30 краін.-0-
