12 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка прыбыў у маскоўскі Крэмль, дзе пройдзе сумеснае мерапрыемства з Прэзідэнтам Расіі Уладзімірам Пуціным з нагоды Дня касманаўтыкі, перадае карэспандэнт БЕЛТА.
Кіраўнікі дзяржаў падвядуць вынікі праведзенай місіі на МКС, дзе ўпершыню ў гісторыі працаваў экіпаж Саюзнай дзяржавы. Прэзідэнты пагутараць з касманаўтамі, абмяркуюць далейшыя перспектывы супрацоўніцтва ў касмічнай сферы.
Як паведамлялася БЕЛТА, у Маскву першы касманаўт суверэннай Беларусі, Герой Беларусі Марына Васілеўская прыбыла напярэдадні з Мінска прэзідэнцкім бортам. У Палацы Незалежнасці 11 красавіка прайшла ўрачыстая цырымонія ўшаноўвання і ўзнагароджання беларускіх касманаўтаў і арганізатараў экспедыцыі на МКС.
На сустрэчы ў Крамлі таксама будзе прысутнічаць яшчэ адзін удзельнік палёту - расійскі касманаўт і ўраджэнец Беларусі Алег Навіцкі.
Раней таксама стала вядома, што Прэзідэнт Расіі Уладзімір Пуцін узнагародзіў ордэнам Гагарына першага касманаўта суверэннай Беларусі Марыну Васілеўскую і расійскіх касманаўтаў Алега Навіцкага і Сяргея Пракоп'ева. Адпаведныя ўказы апублікаваны на расійскім афіцыйным партале прававой інфармацыі.
Напярэдадні вечарам у Крамлі адбыліся перагаворы Аляксандра Лукашэнкі і Уладзіміра Пуціна. Кіраўнікі дзяржаў на працягу чатырох гадзін абмяркоўвалі пытанні двухбаковага супрацоўніцтва, рэагавання на ўзнікаючыя выклікі і пагрозы ў сферы бяспекі, сітуацыю ў рэгіёне і міжнародны парадак дня.-0-
