12 красавіка, Мінск /Кар. БЕЛТА/. Прэзідэнт Беларусі Аляксандр Лукашэнка ў час рэспубліканскага суботніка 12 красавіка наведвае пляцоўку будаўніцтва Нацыянальнага гістарычнага музея і парку Народнага адзінства ў Мінску, дзе будуць высаджаны 80 дрэў, якія сімвалізуюць 80 юбілейных гадоў, што мінулі з Перамогі ў Вялікай Айчыннай вайне, перадае карэспандэнт БЕЛТА.
Кіраўніку дзяржавы далажылі аб праведзенай рабоце па праектаванні і пачатку будаўніцтва парку і музея. Прэзідэнт звярнуў увагу, што пры ўзвядзенні аб'ектаў і здачы іх у эксплуатацыю падыходы былі комплекснымі, а матэрыялы выкарыстоўваліся айчынныя. На гэта старшыня Мінгарвыканкама Уладзімір Кухараў адказаў, што перавагу, безумоўна, аддаюць беларускаму, а імпартнае практычна не выкарыстоўваецца. Прычым айчынныя не толькі матэрыялы, але і тэхналогіі. Так, плануецца будаўніцтва падземнага перахода цераз вуліцу Арлоўскую ад парку і музея да плошчы Дзяржаўнага сцяга без перакрыцця ажыўленай гарадской дарогі, а па тыпе метро. Такую перадавую тэхналогію беларускія спецыялісты асвоілі, калі будаваўся пераход каля гандлёвага цэнтра "Першы нацыянальны гандлёвы дом". І кіраўнік дзяржавы даручаў распаўсюдзіць яе па ўсёй краіне.
На месцы будаўніцтва Нацыянальнага гістарычнага музея і парку Народнага адзінства Аляксандр Лукашэнка заклаў капсулу з пасланнем будучым пакаленням. Прадстаўнікі Беларускага рэспубліканскага саюза моладзі перадалі яму капсулу з пасланнем. Ва ўрачыстай абстаноўцы кіраўнік дзяржавы заклаў яе ў камень.
Пасля чаго Прэзідэнт разам з брыгадамі студэнцкай моладзі высадзіў алею з 80 дрэў, якія сімвалізуюць 80 юбілейных гадоў, што мінулі з Перамогі ў Вялікай Айчыннай вайне. Былі высаджаны саджанцы чырваналістага дуба, якім каля 12 гадоў.
Будаўніцтва Нацыянальнага гістарычнага музея Беларусі вядзецца ў раёне вул.Арлоўскай на тэрыторыі былога парку "Дрымлэнд". Ужо завершана распрацоўка праектнай дакументацыі і ў лютым гэтага года пачаты будаўніча-мантажныя работы. На гэты момант выканана падрыхтоўка катлавана, вядзецца забіўка буранабіўных паляў пад уладкаванне фундамента.
У будаўніцтве музея таксама прымаюць удзел студэнцкія атрады.
Вакол Нацыянальнага гістарычнага музея ў межах пр.Пераможцаў - вул.Арлоўская - рака Свіслач будзе разбіты парк Народнага адзінства. Будаўніча-мантажныя работы пачаліся ў кастрычніку 2024 года.
На бягучы момант на плошчы 16 га знесена тры дзясяткі будынкаў, збудаванняў і малых архітэктурных форм, дэманціраваны інжынерныя камунікацыі. У рамках другой чаргі будаўніцтва прадугледжваецца ўладкаванне запрашальнай плошчы, якая прымыкае да вул.Арлоўскай, узвядзенне ўваходнай аркі, параднай лесвіцы, пляцоўкі для ўрачыстых мерапрыемстваў.
Таксама на тэрыторыі парку запланаваны экспазіцыйныя пляцоўкі абласных цэнтраў і Мінска, пешаходныя дарогі для фарміравання ганаровай алеі, дзіцячыя і спартыўныя пляцоўкі з гульнявым і спартыўным абсталяваннем, тэрыторыі для ціхага адпачынку з альтанкамі і арэлямі, добраўпарадкаванне існуючага вадаёма, рамонт агароджы тэрыторыі парку з уладкаваннем дадатковай агароджы, рэканструкцыя адміністрацыйна-гаспадарчага будынка, трансфарматарнай падстанцыі.-0-
Падпісвайцеся на нас у
