6 мая, Мінск /Кар. БЕЛТА/. Цяпер важна спыніць ваенныя дзеянні ва Украіне, а не вырашаць, хто мае рацыю і хто вінаваты ў існуючай сітуацыі. Аб гэтым Прэзідэнт Беларусі Аляксандр Лукашэнка заявіў у інтэрв'ю інфармацыйнаму агенцтву Associated Press, перадае карэспандэнт БЕЛТА.
Гаворачы аб паведамленнях пра жорсткасць з аднаго ці другога боку ў ходзе канфлікту, Аляксандр Лукашэнка адзначыў, што ў гэтай сітуацыі ён не асуджае ні ўкраінцаў, ні расіян: "Таму што ідзе вайна. Калі забіваюць твайго напарніка, сяржанта, радавога, няхай ён амерыканец або яшчэ нехта, вы ведаеце рэакцыю таго, хто застаўся жывы".
Прэзідэнт звярнуў увагу, што добра праінфармаваны аб тым, што адбываецца ва Украіне і ведае аб гэтым не толькі з размоў са сваім расійскім калегам Уладзімірам Пуціным: "Я часам бачу больш, чым ён, таму што вайна ідзе за агароджай у мяне". У прыватнасці, кіраўнік беларускай дзяржавы валодае інфармацыяй аб абстаноўцы ва ўкраінскіх рэгіёнах, якія мяжуюць з Польшчай, Венгрыяй, Славакіяй.
Аляксандр Лукашэнка ўпэўнены, што цяпер самае галоўнае - спыніць баявыя дзеянні, каб перасталі гінуць людзі з абодвух бакоў. "Пытанне не ў тым, хто мае рацыю, хто вінаваты. Трэба вайну спыніць. Потым мы разбяромся, хто мае рацыю, хто вінаваты, - падкрэсліў ён. - Трэба спыніць гібель людзей. І гэта сёння ў руках нават не Зяленскага - гэта ў руках перш за ўсё Вашынгтона і Лондана. Еўропе гэта вайна не патрэбна".-0-
