4 мая, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў Прэзідэнта Ізраіля Іцхака Герцага з Днём Незалежнасці. Аб гэтым БЕЛТА паведамілі ў прэс-службе беларускага лідара.
"Гэта ўрачыстая дата 74 гады таму стала найважнейшым пунктам адліку сучаснай гісторыі яўрэйскага народа. Мы ганарымся, што выхадцы менавіта з беларускай зямлі, уключаючы першага Прэзідэнта Ізраіля Хаіма Вейцмана, стаялі ля вытокаў стварэння і станаўлення вашай дзяржаўнасці", - гаворыцца ў віншаванні.
Аляксандр Лукашэнка адзначыў, што беларусы і яўрэі жылі побач на працягу стагоддзяў, са шчырым сэрцам дапамагаючы адзін аднаму нават у час самых цяжкіх выпрабаванняў.
"Традыцыі ўзаемнай падтрымкі, адкрытасці, дружбы і сёння з'яўляюцца маналітным фундаментам адносін паміж нашымі краінамі. Упэўнены, канструктыўны дыялог па ўсіх напрамках супрацоўніцтва будзе і ў далейшым садзейнічаць дабрабыту народаў", - падкрэсліў Прэзідэнт.
Кіраўнік дзяржавы пажадаў Іцхаку Герцагу моцнага здароўя і поспехаў у працы, а ўсім грамадзянам Ізраіля - шчасця і мірнага неба над галавой.-0-
