25 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка ад імя беларускага народа і сябе асабіста павіншаваў народ Грэцыі з нацыянальным святам - Днём Незалежнасці. Аб гэтым БЕЛТА паведамілі ў прэс-службе беларускага лідара.
"У сучасных умовах, калі ўвесь свет сутыкнуўся з шэрагам выклікаў і пагроз, вельмі важна берагчы мір і згоду ў грамадстве. Асаблівае значэнне набываюць кантакты, заснаваныя на прынцыпах партнёрства, павагі і ўзаемадапамогі", - гаворыцца ў віншаванні.
Кіраўнік дзяржавы нагадаў, што ў гэтым годзе спаўняецца 30 гадоў з дня ўстанаўлення дыпламатычных адносін паміж Беларуссю і Грэцыяй. "Упэўнены, што багатая шматвяковая гісторыя і агульныя духоўныя каштоўнасці народаў нашых краін стануць добрай асновай для далейшага выбудоўвання канструктыўных двухбаковых сувязей", - падкрэсліў беларускі лідар.
Прэзідэнт выказаў зацікаўленасць Мінска ў развіцці супрацоўніцтва з Афінамі па розных напрамках, уключаючы эканамічную і інвестыцыйную сферы. "Спадзяюся, што, нягледзячы на існуючую палітычную кан'юнктуру, нашы добразычлівыя адносіны будуць толькі ўмацоўвацца", - адзначыў Аляксандр Лукашэнка.
Кіраўнік беларускай дзяржавы пажадаў дружалюбнаму народу Грэцыі здароўя, міру, дабрабыту і ўпэўненасці ў заўтрашнім дні.-0-
