31 снежня, Мінск /Кар. БЕЛТА/. Прэзідэнт Беларусі Аляксандр Лукашэнка сёння наведае рэспубліканскі навукова-практычны цэнтр "Маці і дзіця", паведамляе карэспандэнт БЕЛТА.
Кіраўнік дзяржавы на прыкладзе работы ўстановы азнаёміцца з арганізацыяй перынатальнай дапамогі ў краіне. Як напісаў Telegram-канал "Пул першага", Аляксандр Лукашэнка наведае новы корпус навукова-практычнага цэнтра, дзе выходжваюць дзяцей з рэкордна нізкай масай цела.
Рознаўзроўневая сістэма аховы здароўя маці і дзіцяці функцыянуе ў Беларусі больш за 20 гадоў. У краіне працуюць адзін перынатальны цэнтр IV тэхналагічнага ўзроўню ў "Маці і дзіця", 17 перынатальных цэнтраў III узроўню (абласны і горада Мінска), 27 перынатальных цэнтраў II узроўню (міжраённыя і горада Мінска), а таксама 64 арганізацыі аховы здароўя, якія адносяцца да I раённага ўзроўню.
Беларусь уваходзіць у лік краін з самымі нізкімі паказчыкамі дзіцячай смяротнасці: 2,6 на 1000 народжаных жывымі ў 2020 годзе. Гэта лепшы паказчык сярод усіх краін СНД і многіх развітых краін свету, уключаючы Вялікабрытанію, Данію, Літву, Польшчу, ЗША.
З 1994 года ў Беларусі выходжваюць дзяцей ад 500 г. Выжывальнасць дзяцей з экстрэмальна нізкай масай цела на першым годзе жыцця складае больш за 80 працэнтаў. У рэйтынгу краін шчаслівага дзяцінства Беларусь займае 35-е месца (Расія на 37-й пазіцыі) і размясцілася на 8-м месцы ў рэйтынгу краін з самымі нізкімі паказчыкамі неанатальнай смяротнасці. Мацярынская смяротнасць ад акушэрскіх прычын у Беларусі адна з самых нізкіх у свеце.
Міжнародныя місіі неаднаразова давалі высокую ацэнку падыходам беларускіх спецыялістаў і рэкамендавалі іх да ўкаранення ў іншых краінах.
Навукова-практычны цэнтр "Маці і дзіця" створаны ў лістападзе 2004 года пасля зліцця некалькіх устаноў. У лістападзе гэтага года тут уведзены ў строй новы корпус клінічнага аддзела анестэзіялогіі, рэанімацыі і інтэнсіўнай тэрапіі нованароджаных.
Аддзел уяўляе сабой адзіны комплекс IV тэхналагічнага ўзроўню аказання перынатальнай дапамогі і складаецца з аддзялення анестэзіялогіі і рэанімацыі (з палатамі для нованароджаных дзяцей), выязной рэанімацыйна-кансультатыўнай брыгады для нованароджаных дзяцей. На яго базе таксама арганізаваны навучальны трэнінгавы цэнтр для дзеючых дзіцячых урачоў анестэзіёлагаў-рэаніматолагаў і медыцынскіх сясцёр, а таксама ёсць лабараторыя экстранных аналізаў і аперацыйны блок для правядзення экстранных аперацыйных умяшанняў.-0-
