6 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка сабраў 6 чэрвеня нараду па бягучых пытаннях уступнай кампаніі, паведамляе БЕЛТА.
У ліку ўдзельнікаў мерапрыемства - міністр адукацыі Андрэй Іванец, кіраўнік Адміністрацыі Прэзідэнта Ігар Сергяенка, намеснік прэм'ер-міністра Ігар Петрышэнка, старшыня Камітэта дзяржаўнага кантролю Васіль Герасімаў, дырэктар Рэспубліканскага інстытута кантролю ведаў Юрый Міксюк, прадстаўнікі профільных камісій абедзвюх палат парламента, а таксама кіраўнікі ўстаноў адукацыі рознага ўзроўню. На нарадзе падрабязна разбіраюць праблемныя моманты ў адукацыі і абмяркоўваюць дакладны механізм сістэмы адбору і паступленні ў ВНУ на будучыню.
Як паведамлялася, пасля правядзення ЦЭ па беларускай і рускай мовах ад дзяцей і бацькоў пачалі паступаць шматлікія звароты з просьбай растлумачыць, чаму атрыманы менавіта такі бал, чаму ў некаторых выпадках ён ніжэйшы, чым у час рэпетыцыйнага экзамену.
У сітуацыю ўмяшаўся Прэзідэнт: "Цэлую бучу ўзнялі пасля адзінага цэнтралізаванага экзамену. Розуму не хапіла зрабіць проста і зразумела, каб падлічыць гэтыя балы. Яны пачалі нейкія статыстычныя лічбы выводзіць на камп'ютары. Каму гэта трэба? Па-мойму, мы паступалі: ведаеш - тройка, вельмі добра ведаеш - чацвёрка, вельмі-вельмі добра - выдатна. А тут нейкія балы на камп'ютары вылічвалі".
Прэзідэнт запатрабаваў разабрацца з праблемамі, якія ўзніклі. "Трэба рабіць звычайную, зразумелую сістэму. І на наступным тыдні трэба зноў да гэтага вярнуцца. Сем'і кантралююць паступленне сваіх дзяцей, і гэта натуральна. Але яны не разумеюць, чаго мы хочам ад гэтых дзяцей. І, самае галоўнае, пішуць мне, што цяперашні экзамен "паказаў сваю ідэнтычнасць" з мінулымі двума гадамі, калі яны ў школе здавалі экзамены. Дык навошта мы гэту катавасію тады стварылі?" - адзначыў кіраўнік дзяржавы.
Ён даручыў праверыць арганізацыю ЦЭ, якія прайшлі ў маі, і ўдакладніць атрыманыя вынікі. "Пастаўлена задача ў жорсткія, кароткія тэрміны разабрацца па кожным звароце, кожнай заяве справядліва і аб'ектыўна. Мы над гэтым будзем працаваць у бліжэйшыя дні", - сказаў кіраўнік Адміністрацыі Прэзідэнта Ігар Сергяенка.
Для праверкі карэктнасці апрацоўкі вынікаў першага цэнтралізаванага экзамену была сфарміравана міжведамасная камісія. Па выніках яе работы рэзультаты першага цэнтралізаванага экзамену былі пералічаны па новай методыцы, новыя балы выпускнікоў былі абнародаваны 2 чэрвеня.
"Вынікі праверкі паказалі, што памылак няма, у тым ліку і ў методыцы разліку тэставых балаў. Разам з тым па колькасці зваротаў, якія да нас паступілі ад грамадзян, стала відавочна, што методыка вельмі складаная. Таму Прэзідэнтам нашай краіны Аляксандрам Лукашэнкам дадзена канкрэтнае даручэнне - спрасціць методыку разліку і зрабіць яе зразумелай для кожнага чалавека. Міністэрствам адукацыі такая работа праведзена, у яе распрацоўцы выкарыстоўваліся падыходы, якія прымяняліся пры правядзенні рэпетыцыйнага тэсціравання", - растлумачыў міністр адукацыі Андрэй Іванец.-0-
