20 кастрычніка, Мінск /Кар. БЕЛТА/. У аснову канцэпцыі кантролю і рэгулявання цэн павінна быць пакладзена справядлівасць. Аб гэтым Прэзідэнт Беларусі Аляксандр Лукашэнка заявіў на нарадзе ў Палацы Незалежнасці, перадае карэспандэнт БЕЛТА.
"Учора я папярэдзіў першага віцэ-прэм'ера (Мікалая Снапкова. - Заўвага БЕЛТА), які галавой за гэта адказвае. Усім была пастаўлена задача па выпрацоўцы мер кантролю і рэгулявання цэн. Я хачу, каб вы гэта пачулі. Мы павінны выпрацаваць меры кантролю за цэнаўтварэннем. Што датычыцца замарозкі цэн, размова ішла да 20 кастрычніка або да таго часу, пакуль не ўступіць у сілу пастанова ўрада. Яшчэ раз паўтараю: ніякай размовы аб татальнай, назаўсёды замарозцы цэн не ішло. Калі нехта гэта не пачуў. Размова ішла аб тым, што назапасілі вось столькі "тлушчу", і вы мяне не пераканаеце, што яго няма. Гэта датычыцца ўсіх: і бізнесменаў, прадпрымальнікаў, і кіраўнікоў дзяржаўнай формы", - адзначыў Аляксандр Лукашэнка.
Прэзідэнт нагадаў аб усплёску інфляцыі ў лютым бягучага года. Тады ўрад палічыў, што гэта часовы рост цэн. Аднак калі яны прадоўжылі расці, своечасовыя меры прыняты не былі, звярнуў увагу кіраўнік дзяржавы. У выніку інфляцыя павялічылася ў два разы.
"Што яшчэ трэба? Таму як чалавек зямны я гэта цудоўна ўсё разумею. І маё рашэнне - да сённяшняга дня не чапаць цэны, не дакранацца нават рукой - было прадуманым і абгрунтаваным. Скажыце, хто абваліўся да сённяшняга дня? Ніхто не абваліўся. Сёй-той спалохаўся. Таму што больш на цэнах сваё багацце ствараць не будзеце. Датычыцца ўсіх: вытворцаў, аптавікоў і рознічнага гандлю. Але гэта не значыць, што цэны спынены і заўтра яны расці не будуць. Вось калі мы проста іх замарозім, то сапраўды, перш за ўсё па каве, бананах, яшчэ па нечым у першым прыбліжэнні цэны вырастуць, таму што гэта не ад нас залежыць. Мы іх закупляем. Але для нас гэта не вялікі страх. Хто любіць каву - піце, калі ласка. Калі кава падаражэла - ну, выбачайце, я магу прапанаваць малако, чай. Я каву не п'ю і жывы-здаровы", - сказаў Аляксандр Лукашэнка.
Паводле яго слоў, цэны на імпартныя тавары таксама будуць кантралявацца. Прынамсі такая задача пастаўлена ўраду. "Ніякіх бонусаў у гандлі на імпарт наогул быць не можа. Што значыць "Мы ў цябе тавар возьмем і паставім вось на гэту паліцу, калі ты нам нешта прыплаціш?" Хабар дасі! Не давядзі гасподзь. Ні на імпарт, ні на нашы тавары ніякіх бонусаў быць не павінна", - папярэдзіў Прэзідэнт.-0-
