Лукашэнка разлічвае на спыненне вайны ва Украіне ў бягучым годзе

14 сакавіка, Масква /Кар. БЕЛТА/. Прэзідэнт Беларусі Аляксандр Лукашэнка разлічвае на спыненне вайны ва Украіне ў бягучым годзе. Аб гэтым кіраўнік дзяржавы заявіў у інтэрв'ю тэлевядучай Вользе Скабеевай для тэлеканала "Расія-1", перадае карэспандэнт БЕЛТА.

Адказваючы на пытанне, ці адчувае ён нейкі падвох у прапановах амерыканскага боку ў адрас Расіі або ўсё ж такі "пахне мірам", Прэзідэнт сказаў: "Не, у іх не можа быць падвоху. Нічога пакуль (канкрэтнага плана. - Заўвага БЕЛТА), я гавару, не, але пахне мірам. Я думаю, што ў гэтым годзе нам удасца нешта зрабіць з гэтай (вайной. - Заўвага БЕЛТА), спыніць яе. І не толькі тут, але і ў яўрэяў - там, Палесціна, на Блізкім Усходзе. Чаму? Таму што і асабіста Дональд (Прэзідэнт ЗША Дональд Трамп. - Заўвага БЕЛТА) хоча стаць нобелеўскім лаўрэатам. Калі ласка, мы яго прадставім, толькі б мір гэты быў".

Аляксандр Лукашэнка адзначыў, што ўсталяванне міру было заяўлена як галоўны трэнд у палітыцы цяперашняга Прэзідэнта ЗША пасля тэмы Кітая. "На кітайскім напрамку цішыня цяпер, а гэта (пытанні ўсталявання міру. - Заўвага БЕЛТА) выпінаецца. Таму яму ўжо ад гэтага нікуды не дзецца. Гэтыя падзеі штурхаюць яго на паверхню: давай вынік! Таму я не думаю, што яны робяць гэта як падвох. Не, тут падвоху няма, але верыць нельга. Факты на стол - будзем глядзець гэтыя канкрэтныя факты і прымаць рашэнні. Каб не ашукалі, як Пуцін кажа, як у былыя часы. Я гавару, каб вакол пальца не абвялі. Не абвядуць. Мы ж ужо наеліся гэтага ўсяго", - сказаў Прэзідэнт.-0-