9 жніўня, Мінск /Кар. БЕЛТА/. Прэзідэнт Беларусі Аляксандр Лукашэнка адзначае наяўнасць зрухаў у пытанні кампенсацыі Беларусі ад расійскага падатковага манеўру ў нафтавай сферы. Аб гэтым ён заявіў сёння ў час "Вялікай размовы з Прэзідэнтам", перадае карэспандэнт БЕЛТА.
"Падатковы манеўр трэба падлічыць і кампенсаваць, калі будзе такое рашэнне. Але зрухі ў гэтым напрамку ёсць. З нашага боку таксама былі абавязацельствы, мы іх выканалі і зрабілі першы крок. Гэта ў памеры каля 50 працэнтаў, - сказаў беларускі лідар. - Мы не хочам нейкую суму, мы хочам, каб нашы прадпрыемствы па нафтаперапрацоўцы (а гэта іх датычыцца) былі ў роўных умовах з расійскімі хаця б у гэтым плане". Бо ад увядзення гэтага падатковага манеўру ва ўроне застаюцца толькі беларускія прадпрыемствы, якія перапрацоўваюць расійскую нафту.
Як паведамлялася, падтрымка Беларусі ў сувязі з падатковым манеўрам у Расіі была адной з тэм ліпеньскай сустрэчы Аляксандра Лукашэнкі і Уладзіміра Пуціна ў Сочы. "Знойдзена рашэнне па падатковым манеўры ў Расіі ў галіне перапрацоўкі нафты ў частцы кампенсацыі страт Беларусі ад таго самага падатковага манеўру", - заяўляла прэс-сакратар Прэзідэнта Беларусі Наталля Эйсмант, каменціруючы перагаворы двух лідараў.
Яшчэ раней, у чэрвені, Аляксандр Лукашэнка заявіў, што Беларусь і Расія дасягнулі прынцыповай дамоўленасці па мінімізацыі страт беларускіх НПЗ ад падатковага манеўру ў Расіі з 1 студзеня 2022 года. Урадам даручана канчаткова адпрацаваць гэту схему.-0-
