26 мая, Мінск /Кар. БЕЛТА/. Прыняўшы самыя жорсткія меры, беларуская дзяржава ў зародку падавіла хвалю неанацызму. Аб гэтым Прэзідэнт Беларусі Аляксандр Лукашэнка заявіў сёння на сустрэчы з парламентарыямі, членамі Канстытуцыйнай камісіі і прадстаўнікамі органаў дзяржаўнага кіравання, перадае карэспандэнт БЕЛТА.
"Вайну светапоглядаў мы, напэўна, выйгралі. Прыняўшы самыя жорсткія меры, мы ў зародку падавілі хвалю неанацызму, - заявіў Аляксандр Лукашэнка. - Яны хочуць рэвізіі менавіта цяпер. Іх памылковыя перакананні ў вяршэнстве права нічога не вартыя на фоне спроб апраўдаць нацызм і перапісаць гісторыю. Але наша сіла ў праўдзе, а іх, з вашага дазволу, праўда - у сіле".
Прэзідэнт падкрэсліў, што беларусы як нацыя дараслі да таго, каб бачыць карані нацыянальнай самасвядомасці. "Яна расце з Вялікай Перамогі, калі наш народ процістаяў генацыду. Цяпер мы сур'ёзна ўзяліся за гэту тэму і расследуем, нічога не ўтойваем, прадстаўляючы народу вінаватых. Мы не будзем больш саромецца, як гэта было ў перыяд Савецкага Саюза. Мы адкрыем усё, што тут адбывалася, - сказаў кіраўнік дзяржавы. - Нашы дзеянні па выкрыцці злачынцаў маглі падацца празмернымі тым, хто апраўдвае іх злачынствы. Але гэта стратэгія - жыццёва важная для краіны".-0-