11 лютага, Мінск /Кар. БЕЛТА/. Прэзідэнт Беларусі Аляксандр Лукашэнка 11 лютага прыняў з дакладам пастаяннага прадстаўніка Беларусі ў ААН Валянціна Рыбакова, перадае карэспандэнт БЕЛТА.
Кіраўнік дзяржавы перш за ўсё пацікавіўся ў беларускага дыпламата, як развіваецца сітуацыя ў ЗША пасля выбараў і ў чым адметнасць дзейнасці цяперашняга Прэзідэнта Дональда Трампа. "Калі ў вас ёсць такія ўражанні і інфармацыя адпаведная", - дадаў Аляксандр Лукашэнка.
"І што адбываецца ў Арганізацыі Аб'яднаных Нацый? Трэба аддаць належнае, Дональд салідна ўзварухнуў некаторыя міжнародныя структуры. Як гэта паўплывала на Арганізацыю Аб'яднаных Нацый? І іншыя пытанні, якія датычацца Беларусі ў сувязі з гэтым", - сказаў Прэзідэнт.
Пасля сустрэчы з кіраўніком дзяржавы Валянцін Рыбакоў расказаў журналістам, што далажыў аб сітуацыі, якая складваецца ў Злучаных Штатах і ў ААН. "ААН з'яўляецца не нейкай абстрактнай, міфічнай пляцоўкай. Гэта 193 дзяржавы. Зразумела, усё тое, што адбываецца ў ААН, гэта адлюстраванне тых праблем, з якімі сутыкаецца кожная канкрэтная краіна. З улікам вялікай колькасці праблем у свеце, канфліктаў, войнаў, зразумела, гэта сітуацыя самым непасрэдным чынам аказвае ўздзеянне на работу арганізацыі", - адзначыў дыпламат.
"Пастаяннае прадстаўніцтва Рэспублікі Беларусь пры ААН выконвае ўсе пастаўленыя задачы, папулярызуе нашы ініцыятывы. Спраўляемся з гэтым даволі паспяхова. Ёсць, зразумела, да чаго яшчэ імкнуцца. Нейкай варожасці, непрымання ў адносінах да нас мы не бачым і не адчуваем. Прадстаўнікі нават самых недружалюбных дзяржаў разумеюць нашу пазіцыю, разумеюць нашы аргументы. Не абавязкова згаджаюцца з імі ў асобных выпадках, але нас чуюць, і тыя, хто хочуць з намі ўзаемадзейнічаць, робяць гэта вельмі-вельмі паспяхова, у тым ліку дэлегацыі не самых дружалюбных дзяржаў", - заявіў Валянцін Рыбакоў.-0-
Падпісвайцеся на нас у
