9 верасня, Масква /Кар. БЕЛТА/. Прэзідэнт Беларусі Аляксандр Лукашэнка прыбыў з рабочым візітам у Расію, перадае карэспандэнт БЕЛТА.
У Крамлі сёння ў другой палове дня пройдуць перагаворы Прэзідэнта Беларусі з расійскім калегам Уладзімірам Пуціным.
Кіраўнікі дзяржаў яшчэ раз абмяркуюць 28 саюзных праграм, падрыхтаваных урадамі дзвюх краін, а таксама іншыя актуальныя пытанні двухбаковага парадку дня і міжнародную праблематыку. Адной з тэм будзе сітуацыя ў Афганістане, у тым ліку ў сувязі з маючымі адбыцца ў сярэдзіне верасня самітамі Арганізацыі Дагавора аб калектыўнай бяспецы і Шанхайскай арганізацыі супрацоўніцтва ў Душанбэ.
Як паведамлялася БЕЛТА, на гэты момант на ўрадавым узроўні кансэнсус знойдзены па ўсіх 28 саюзных праграмах, бакі выйшлі на фінішную прамую. Прэзідэнтам трэба будзе ацаніць праведзеную ўрадамі работу, вырашыць, ці гатовы праграмы да падпісання ў тым выглядзе і ў тых канструкцыях, у якіх яны на гэты момант прадстаўлены. Асноўны акцэнт у дакументах зроблены на ўстойлівасці эканамічнага развіцця дзяржаў.
Саюзныя праграмы ўключаюць у сябе дамоўленасці ў сферы эканамічнай інтэграцыі. Гэта ў тым ліку такія напрамкі, як збліжэнне макраэканамічнай палітыкі, грашова-крэдытныя аспекты, пытанні прамысловай, аграрнай палітыкі і мытнага адміністравання, падатковага заканадаўства, абароны правоў спажыўцоў, канкурэнцыі і гандлёвай дзейнасці.
Блок прысвечаны энергетычнаму комплексу, уключаючы фарміраванне аб'яднаных рынкаў, развіццё атамнай энергетыкі. Ёсць таксама праграма, прысвечаная агульным падыходам у рабоце на транспартным рынку.
Саюзныя праграмы ахопліваюць пытанні ўніфікацыі сацыяльна-працоўных аспектаў, роўнасці правоў грамадзян Беларусі і Расіі, арганізацыі турыстычнай сферы.
Работа над адпаведнымі дакументамі вялася на працягу апошніх трох гадоў і ідзе ў развіццё шэрага палажэнняў, замацаваных у дагаворы аб Саюзнай дзяржаве 1999 года.
Падпісаць праграмы на прэзідэнцкім узроўні плануецца на Вышэйшым дзяржсавеце Саюзнай дзяржавы. Яго пасяджэнне хочуць правесці ў кастрычніку-лістападзе. Калі Аляксандр Лукашэнка і Уладзімір Пуцін канчаткова дамовяцца на перагаворах 9 верасня, то на ўзроўні ўрадаў адпаведныя праграмныя дакументы могуць быць падпісаны ўжо на наступны дзень - у Мінску на 10 верасня запланавана пасяджэнне саюзнага Саўміна.
У выпадку адабрэння і прыняцця падрыхтаваных праграмна-стратэгічных дакументаў, бакі будуць выбудоўваць па іх адносіны як мінімум у бліжэйшыя некалькі гадоў - да 2024-2025, а па некаторых праграмах і да 2027 года. Пры гэтым якія-небудзь палітычныя пытанні, тым больш звязаныя са стратай суверэнітэту, у праграмах адсутнічаюць.-0-
