9 сакавіка, Мінск /Уладзімір Мацвееў - БЕЛТА/. Прапаноў аб пастаўках і перапрацоўцы ў Беларусі нафты ўжо нямала. Аб гэтым Прэзідэнт Беларусі Аляксандр Лукашэнка заявіў 7 сакавіка на сустрэчы са старшынёй канцэрна "Белнафтахім" Андрэем Рыбаковым і віцэ-прэм'ерам Юрыем Назаравым, перадае карэспандэнт БЕЛТА.
"Тэма размовы, як вам вядома, ранейшая - пастаўкі ў Беларусь вуглевадароднай сыравіны, перш за ўсё нафты. Мне паступіў шэраг прапаноў па пастаўках нафты і перапрацоўцы ў Беларусі. Цяпер такіх прапаноў ужо, дзякуй богу, нямала. Я хачу з вамі ўзгадніць некаторыя пытанні. І параіцца, як нам (варта, не варта купляць гэту нафту) лепш зрабіць, што больш эканамічна выгадна", - сказаў кіраўнік дзяржавы.
"Думаю, што мы знойдзем рашэнне. Я вас выклікаў у выхадны дзень, таму што пытанне адкладваць нельга. Нам трэба прымаць рашэнне і ўжо з панядзелка-аўторка забіраць гэту нафту. Таму што аб'ёмы вялікія - больш як 6 млн т", - дадаў Аляксандр Лукашэнка.
Як паведамляла БЕЛТА, у аўторак 3 сакавіка Аляксандр Лукашэнка таксама правёў нараду па пытаннях забеспячэння эфектыўнай работы нафтаперапрацоўчага комплексу краіны да 2020 года і на перспектыву.
Ён канстатаваў, што асобныя дзяржавы зразумелі, што пры дапамозе вентыля на нафтавай трубе выгадныя ім пытанні вырашаюцца значна лягчэй. Нягледзячы ні на якія ўзаемныя абавязацельствы, такая практыка стала прымяняцца і ў адносінах да Беларусі. У той жа час менавіта на нафтавую сыравіну завязаны не толькі патрэбнасці ўнутранага рынку паліва, але і стабільная работа хімічных і іншых прадпрыемстваў. "Мы неапраўдана зацыкліліся на некалькіх пастаўшчыках і не маем доўгатэрміновых альтэрнатыўных крыніц сыравіны. Нафта - не манапольны тавар, і жадаючых працаваць з намі дастаткова нават у самой Расіі. Пастаўшчыкоў трэба знаходзіць, з імі трэба дамаўляцца. І гэта задача нумар адзін. Асабліва ў цяперашняй няпростай сітуацыі, якая склалася ў свеце, у тым ліку з нашым партнёрам-манапалістам", - заявіў Аляксандр Лукашэнка.
Не менш інтэнсіўна, падкрэсліў кіраўнік дзяржавы, трэба адпрацоўваць лагістыку паставак. У гэтым плане неабходны не проста дагаворы на транспарціроўку нафты, а комплексныя і сістэмныя інфраструктурныя рашэнні, трэба прадумаць магчымасць рэалізацыі сумесных праектаў з замежнымі кампаніямі - уласнікамі сыравіны.-0-
