1 верасня, Мінск /Кар. БЕЛТА/. Прэзідэнт Беларусі Аляксандр Лукашэнка на адкрытым уроку "Гістарычная памяць - дарога ў будучыню" прадставіў новы айчынны камп'ютар, перадае карэспандэнт БЕЛТА.
"Я спецыяльна папрасіў, каб сёння прынеслі на нашу сустрэчу вось гэты прадукт - першы камп'ютар, які мне падарылі нашы разумныя людзі. Ім была пастаўлена задача "паблукаць" па ўсім свеце, знайсці самае лепшае з таго, што мы пакуль не можам ствараць (працэсары, праграмнае забеспячэнне), і стварыць гэты камп'ютар. Шчыра скажу, у ім сёння каля 12 працэнтаў беларускага. Да канца года будзе 30 працэнтаў. Але важны сам факт", - падкрэсліў Аляксандр Лукашэнка.
Камп'ютар створаны на беларускім заводзе "Гарызонт". "Дакрануўшыся да яго, вы не сказалі б, што ён створаны ў Беларусі. Гэта сведчыць аб тым, што ў нас ёсць вельмі вялікі патэнцыял. У нас ёсць людзі, якія (як амерыканцы некалі мне сказалі, калі я ствараў Парк высокіх тэхналогій) умеюць ствараць неверагоднае. Выступаючы тады на нарадзе ў мяне, амерыканскі спецыяліст падняўся і гаворыць: калі вы хочаце нешта стварыць, можна ў многіх краінах свету гэта зрабіць, але калі хочаце стварыць нешта неверагоднае - прыязджайце ў Беларусь", - падзяліўся ўспамінамі кіраўнік дзяржавы.
"Мы тады толькі-толькі пачыналі ствараць Парк высокіх тэхналогій, толькі-толькі думалі запусціць свой спадарожнік у космас. І тады нашы людзі сябе вельмі сур'ёзна зарэкамендавалі. І мы нямала зрабілі. У тым ліку і гэта", - адзначыў Прэзідэнт, паказваючы на новы айчынны камп'ютар.
Аляксандр Лукашэнка выказаў упэўненасць, што гэта будзе самы сучасны камп'ютар на ўзроўні сусветных стандартаў. "Вы можаце сказаць - ну зразумела, тут жа яшчэ і імпартныя складнікі. Але ва ўсіх самых лепшых камп'ютарах няма поўнасцю камплектуючых толькі адной краіны. Гэта збор твораў усё планеты. Такія суперсучасныя рэчы не робіць (поўнасцю. - Заўвага БЕЛТА) ні адна краіна. І не таму, што, напрыклад, амерыканцы або кітайцы не могуць гэта зрабіць, а таму, што ў гэтым няма ніякай неабходнасці. Навука вельмі інтэрнацыянальная, і тое, што яна стварае, таксама з'яўляецца інтэрнацыянальным прадуктам", - звярнуў увагу ён.
Кіраўнік дзяржавы таксама нагадаў, што ў супрацоўніцтве з расійскімі спецыялістамі былі раней створаны некалькі суперкамп'ютараў.
"У вас узнікае пытанне: навошта Прэзідэнт на гэтым уроку ўсё пералічыў: ад збожжавых да суперкамп'ютараў. Паважаныя сябры! Такім чынам наш народ, мы з вамі пішам сваю гісторыю", - рэзюмаваў Прэзідэнт.-0-
