Лукашэнка пра разведчыкаў: такіх спецыялістаў трэба цаніць, яны для нас даражэйшыя за золата

20 лютага, Мінск /Кар. БЕЛТА/. Прэзідэнт Беларусі Аляксандр Лукашэнка на пашыранай нарадзе з кіруючым складам дзяржаўных органаў сістэмы забеспячэння нацыянальнай бяспекі асабліва адзначыў работу разведчыкаў і тых супрацоўнікаў сілавых структур, якія задзейнічаны ў розных аперацыях, перадае карэспандэнт БЕЛТА.

На нарадзе кіраўнік дзяржавы агучыў у тым ліку некаторую інфармацыю закрытага характару аб планах збеглых апанентаў і іх замежных куратараў.

"Гэта не выдумка Лукашэнкі або нашых спецслужбаў. І дзякуй нашай разведцы і хлопцам. Я Івану Станіслававічу (старшыня КДБ Іван Тэртэль. - Заўвага БЕЛТА) заўсёды гавару: такіх спецыялістаў трэба цаніць. Даражэйшыя за золата яны для нас. Яны павінны ўсюды і заўсёды быць падтрыманы. У тым ліку і тыя, хто валяўся два тыдні на граніцы, затрымліваючы гэтых дыверсантаў з Украіны", - падкрэсліў беларускі лідар.

"Мы пра гэта з вамі і Іванам Кубраковым (міністр унутраных спраў. - Заўвага БЕЛТА) не раз гаварылі. Трэба гэтых хлопцаў не забываць. Усіх, хто працуе", - дадаў Прэзідэнт.

Аляксандр Лукашэнка адзначыў, што многія ваенныя, супрацоўнікі сілавых структур спакойна працуюць у штабах, няхай і выконваючы сваю патрэбную работу. "Але гэтыя сёння ваююць. І іх трэба падтрымліваць. У тым ліку і разведчыкаў", - падкрэсліў ён.-0-