1 верасня, Бабруйск /Кар. БЕЛТА/. Прэзідэнт Беларусі Аляксандр Лукашэнка ўпэўнены ў неабходнасці ваенна-патрыятычнага выхавання ў школах. Аб гэтым ён расказаў сёння, адказваючы на пытанні журналістаў, перадае карэспандэнт БЕЛТА.
"Патрэбна. Мы гэта ведаем, што патрэбна, і мы гэта будзем рабіць. Рашэнне прынята. Зыходзячы не толькі з мінулага года. Ён проста падагнаў гэту хвалю. Мы бачылі, што недапрацоўваем у гэтым плане. Спадзяваліся: а што там - патрыятызм выхоўваць, навучаць, гэта і так зразумела. Аказалася, патрэбна, аказалася, не ўсім зразумела", - адзначыў кіраўнік дзяржавы.
Ён таксама выказаўся аб функцыях ваенрукоў у школах, якія ў тым ліку павінны дапамагаць забяспечваць бяспеку ва ўстановах адукацыі, займацца ваенна-патрыятычным выхаваннем. "Я назваў бы іх асноўнымі асобамі, якія адказваюць за бяспеку школы. Бяспека звязана і з патрыятычным, і ваенна-патрыятычным выхаваннем. Ён і гэтым павінен займацца, - сказаў Прэзідэнт. - Але галоўнае - бяспека ў школе. Дзеці павінны сябе адчуваць у бяспецы, і бацькі не павінны перажываць. Гэта асноўны напрамак. Ён павінен дапамагчы дырэктару забяспечыць бяспеку ў школе і выхоўваць дзяцей у духу гэтай бяспекі. Таму што можна паставіць на кожным вуглу афіцэра бяспекі, а бяспеку не забяспечыць, калі мы саміх дзяцей да гэтага не прывучым, калі яны не будуць берагчы гэта бяспечнае асяроддзе. Гэта галоўнае для гэтых ваенных, якіх мы накіроўваем у школу".
Паводле слоў Прэзідэнта, гэтыя людзі таксама павінны ведаць калектыў школы, праблемных дзяцей і бацькоў, аказваць дапамогу дырэктару. Пры гэтым, падкрэсліў кіраўнік дзяржавы, за ваенна-патрыятычнае выхаванне адказныя ўсе - сям'я, дырэктар, кіраўніцтва школы і ўвесь педагагічны калектыў. Паколькі аднаму немагчыма выхаваць патрыёта. Для гэтага неабходна стварыць адпаведнае асяроддзе. "А ваенны - як асноўны "вінцік" у гэтым асяроддзі. Дырэктар - галоўная дзеючая асоба ў школе па ваенна-патрыятычным выхаванні. А яго месца (ваенрука. - Заўвага БЕЛТА) трэба знайсці ў тым ліку і ў ваенна-патрыятычным выхаванні", - упэўнены беларускі лідар.
Кіраўнік дзяржавы папярэдзіў, што ў гэтым плане не павінна атрымацца так, што набяруць людзей на адпаведныя пасады, а яны не будуць разумець, чым займацца. "Як раней, як некалі ў нас было, будуць вучыць вучня, як уставіць патрон у патроннік або разабраць аўтамат. Гэта таксама трэба ўмець, але ў нас у кожным раёне ёсць цэнтры, дзе гэтаму навучаюць. Каб не было дубліравання", - сказаў Аляксандр Лукашэнка.-0-
