20 верасня, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў кіраўніцтва, асабовы склад і ветэранаў мытнай службы з 30-годдзем з дня ўтварэння мытных органаў. Аб гэтым БЕЛТА паведамілі ў прэс-службе беларускага лідара.
"За гэтыя гады вы прайшлі вялікі шлях, крок за крокам выбудоўваючы надзейную сістэму абароны эканамічнага суверэнітэту дзяржавы", - гаворыцца ў віншаванні.
Асаблівыя словы ўдзячнасці Прэзідэнт адрасаваў ветэранам, якія заклалі трывалыя асновы для эфектыўнай работы беларускай мытні па спыненні кантрабанды, незаконнага трафіка праз граніцу наркотыкаў і зброі, кантрафактных і няякасных тавараў.
"Як вынік, ваш калектыў сёння валодае сур'ёзным кадравым і тэхнічным патэнцыялам для вырашэння на належным якасным узроўні пастаўленых перад ім дзяржаўных задач. Пры гэтым абстаноўка на нашых рубяжах, якая ўскладняецца, патрабуе ад кожнага супрацоўніка яшчэ большай самааддачы, адказнасці і кампетэнтнасці", - адзначыў Аляксандр Лукашэнка.
Кіраўнік дзяржавы выказаў упэўненасць, што супрацоўнікі мытнай службы і ў далейшым будуць з гонарам і годнасцю служыць Айчыне, надзейна процідзейнічаючы ўсім праявам трансгранічнай злачыннасці, забяспечваючы транзітную прывабнасць і спрыяльны дзелавы клімат у Беларусі.
Прэзідэнт падзякаваў асабоваму складу і ветэранам мытні за добрасумленную службу, стойкасць і вернасць прысязе, а таксама пажадаў моцнага здароўя, асабістага і сямейнага дабрабыту, новых прафесійных дасягненняў на карысць краіны і народа.-0-