24 студзеня, Мінск /Кар. БЕЛТА/. Удзельнікі незаконных ваенізаваных фарміраванняў будуць несці асаблівую адказнасць і павінны разумець, што за мяжой яны нікому не патрэбны. Аб гэтым Прэзідэнт Беларусі Аляксандр Лукашэнка заявіў на нарадзе аб грамадска-палітычнай абстаноўцы і стане злачыннасці ў краіне, перадае карэспандэнт БЕЛТА.
"Хто свядома пераступіў мяжу закону, паставіў пад пагрозу чалавечыя жыцці, пры падтрымцы заходніх спецслужбаў прадаўжае дэструктыўную дзейнасць супраць нашай краіны, будзе адказваць перад законам. Закон мы прывялі ў адпаведнасць і дастаткова ўзмацнілі. Тым больш што асобныя з тых, хто туды пабеглі (есці ж хочацца), узмацнілі пазіцыю і цяпер стаўку робяць на прымяненне сілы і стварэнне незаконных ваенізаваных фарміраванняў. У такім выпадку дарогі назад няма і не будзе", - заявіў Прэзідэнт.
У сувязі з гэтым Аляксандр Лукашэнка згадаў пра "каліноўцаў" ва Украіне і фарміруемых у Літве і Польшчы харугвах. "Афіцыйныя ўлады ад іх спрабуюць дыстанцыравацца. Мы гэта добра бачым. Мы дакладна разумеем і ведаем, - сказаў Прэзідэнт. - Іх на фронт адпраўляюць: "Ідзіце на фронт, трэніруйцеся. Натрэніруецеся - паедзеце ў Беларусь звяргаць уладу. Учыніце там шабаш, вайнушку". Нядаўна на фронце трапілі пад абстрэл. Нямала загінула, але калекамі ж колькі засталося. Каму яны сёння патрэбны? Нікому. Прэзідэнт Зяленскі іх на калясцы па хакейнай пляцоўцы катаць не будзе (на злобу - хлопец ваяваў за сваю зямлю, адарвала нагу. І другую ледзь не страціў, калі б не нашы ўрачы). Але гэта іх выбар. Яны павінны ведаць, што з імі будзем разбірацца па законах ваеннага часу".
Кіраўнік дзяржавы падкрэсліў, што наперадзе сур'ёзная работа, каб ва ўсім разабрацца. "Агулам ніхто нічога не павінен рабіць. Паколькі мы страцім сваіх прыхільнікаў і законна страцім. Мы гэта павінны ўлічваць", - акцэнтаваў увагу Прэзідэнт.
Як паведамлялася БЕЛТА, Аляксандр Лукашэнка 21 студзеня ў канцы аматарскага хакейнага матчу арганізаваў круг пашаны па лядовай арэне для хлопца на інваліднай калясцы з Данбаса. Гэта быў ураджэнец Данецка Павел Прахарэнкаў, які прысутнічаў на матчы сярод балельшчыкаў.
У Беларусь хлопец трапіў у 2022 годзе - на лячэнне. Справа ў тым, што Павел - ваенны. Ён пайшоў у армію яшчэ ў 2017-м і за 5 гадоў у артылерыі даслужыўся да лейтэнанта. Да пачатку расійскай спецаперацыі ўжо кіраваў узводам. Вясной 2022 года яго тэхніка падарвалася на міне, асколкам афіцэру зачапіла ногі. У данецкай бальніцы Паўлу ампутавалі адну нагу, каб выратаваць другую, хлопца адправілі ў Беларусь. Медыкам Мінскай абласной клінічнай бальніцы ўдалося выратаваць хлопцу другую нагу - яе збіралі літаральна як мазаіку.-0-
