14 кастрычніка, Астана /Кар. БЕЛТА/. Прэзідэнт Беларусі Аляксандр Лукашэнка ў Астане па просьбе расійскіх журналістаў адказаў на пытанне, як ён успрымае заяву, якая прагучала ва Украіне на афіцыйным узроўні, аб тым, што гэта краіна дэ-факта з'яўляецца членам НАТА, перадае карэспандэнт БЕЛТА.
"Мы ніяк гэта не ўспрымаем. Жаданае за сапраўднае можна выдаваць. А наогул нас гэта не вельмі хвалюе. Хочуць яны быць членамі НАТА - ну гасподзь з імі. З усімі, вядома, наступствамі, якія з гэтага вынікаюць", - сказаў Прэзідэнт.
Як паведамлялася БЕЛТА, кіраўнік украінскага Міністэрства абароны Аляксей Рэзнікаў пасля перагавораў з генеральным сакратаром Паўночнаатлантычнага альянсу Енсам Столтэнбергам заявіў, што Украіна ўжо дэ-факта знаходзіцца ў НАТА. Паводле яго слоў, сведчыць аб гэтым дазваляе доўгае супрацоўніцтва паміж Кіевам і НАТА. У прыватнасці, Аляксей Рэзнікаў напісаў на сваёй афіцыйнай старонцы ў Twitter: "Удзячны НАТА і Енсу Столтэнбергу за падтрымку Украіны. Мы прайшлі доўгі шлях і дэ-факта далучыліся да альянсу". Ён таксама выказаў меркаванне, што паспяховыя рэформы адкрыюць "новыя гарызонты для Украіны".
У канцы верасня 2022 года ўкраінскі лідар Уладзімір Зяленскі падпісаў заяўку на ўступленне ў Паўночнаатлантычны альянс у паскораным парадку. Тыдзень таму еўракамісар па ўнутраным рынку Еўрасаюза Цьеры Брэтон заявіў, што Украіна не можа ўступіць у НАТА ў перыяд ваенных дзеянняў на сваёй тэрыторыі. Ён назваў такую заяўку "палітычным дэмаршам".-0-
