31 снежня, Мінск /Кар. БЕЛТА/. Прэзідэнт Беларусі Аляксандр Лукашэнка ў пераднавагодні дзень, 31 снежня наведаў РНПЦ "Маці і дзіця", паведамляе карэспандэнт БЕЛТА.
Міністр аховы здароўя Дзмітрый Піневіч і дырэктар РНПЦ Сяргей Васільеў далажылі Прэзідэнту аб арганізацыі перынатальнай дапамогі ў краіне і рабоце РНПЦ.
Прэзідэнт заявіў, што ў краіне неабходна прадоўжыць актыўнае развіццё рэпрадуктыўных тэхналогій. У прыватнасці, даручыў стварыць банк генетычнага матэрыялу для ЭКА. "На злобу, нядаўна абмяркоўвалі гэту праблему: гавораць, у нас незакончаная гэта сістэма. У нас няма банка. У нас гэта не развіта, давайце мы гэтым зоймемся прынцыпова", - сказаў ён.
Прэзідэнту расказалі аб паспяховым выкананні ўнікальнай унутрывантробнай аперацыі. "Вось прайшло ўжо два тыдні, дзіця прадаўжаюць выходжваць", - адзначыў дырэктар РНПЦ "Маці і дзіця" Сяргей Васільеў.
Аляксандр Лукашэнка ў новым корпусе наведаў лячэбны блок, у тым ліку аддзяленне, дзе выходжваюць малых вагой ад 500 г, а часам і меншых. "Надзеньце ўсе маскі! І мне дайце маску. Гэта дзеткі!" - скамандаваў ён на ўваходзе ў аддзяленне.
Прэзідэнт з цеплынёй паразмаўляў з медперсаналам і асабліва мамамі немаўлят. Сярод іх былі і тыя, чые малюткі ўжо даволі падраслі, каб іх можна было спакойна ўзяць на рукі. Кіраўнік дзяржавы з гатоўнасцю адрэагаваў на прапанову сфатаграфавацца з нованароджанымі і іх маці. Для маленькіх Яраслава і Марка, калі яны падрастуць, гэта будзе асаблівае памятнае фота - яны зручна размясціліся на руках у Аляксандра Лукашэнкі.
Зразумела, перад Новым годам Прэзідэнт прыехаў са шматлікімі падарункамі для маці і іх малышоў, а таксама ўрачоў, якія штодзень выходжваюць малютак. З салодкімі падарункамі - рознымі сартамі вінаграду, арэхамі і не толькі - дапамаглі калегі кіраўніка дзяржавы па СНД з паўднёвых краін. Аляксандр Лукашэнка нядаўна вярнуўся з Санкт-Пецярбурга, дзе праходзіў нефармальны саміт Садружнасці, і цяпер шчодра падзяліўся перададзенымі для яго пачастункамі. "Гэта не я вырасціў. Я ў Піцеры быў. Гэта ў нас добрыя сябры. Мы дружна жывём з прэзідэнтамі", - адзначыў беларускі лідар.
Але галоўным падарункам ад Аляксандра Лукашэнкі для РНПЦ стаў новы апарат ультрагукавой дыягностыкі.
Варта адзначыць, што ў цэлым у пераднавагодні дзень у Прэзідэнта традыцыйны рабочы графік. Раніцу Аляксандр Лукашэнка пачаў з хакейнай трэніроўкі са сваёй камандай, павіншаваў іх з надыходзячым Новым годам. "Павіншаваў хакеістаў. Правялі інтэнсіўную трэніроўку", - сказаў ён. Гэта ўжо таксама традыцыя.
На заканчэнне свайго наведвання РНПЦ ён падзякаваў урачам, але папярэдзіў, што расслабляцца пакуль не трэба. "У нас "вайна" не скончана. У будучым годзе нам давядзецца ратаваць людзей", - сказаў ён.
"Засталося павіншаваць народ з Новым годам і падпісаць указ аб Годзе гістарычнай памяці. Год насычаны, але не горшы за папярэдні", - рэзюмаваў Аляксандр Лукашэнка.-0-
