16 мая, Мінск /Кар. БЕЛТА/. Прэзідэнт Беларусі Аляксандр Лукашэнка павіншаваў калектыў Акадэміі МУС з 65-годдзем з дня яе ўтварэння. Аб гэтым БЕЛТА паведамілі ў прэс-службе беларускага лідара.
"Слаўныя традыцыі служэння Айчыне ў спалучэнні з інавацыйнымі метадамі навучання і сучаснай матэрыяльна-тэхнічнай базай даюць магчымасць калектыву ВНУ рыхтаваць высокакваліфікаваных спецыялістаў для органаў унутраных спраў, а таксама кадры вышэйшай навуковай кваліфікацыі для ведамасных устаноў адукацыі, - гаворыцца ў віншаванні. - Выпускнікі міліцэйскай альма-матар, валодаючы вялікім багажом ведаў, з'яўляюцца прыкладам патрыятызму і прафесіяналізму, здольныя з гонарам і годнасцю выконваць пастаўленыя задачы па забеспячэнні законнасці і правапарадку ў краіне".
Асобныя словы ўдзячнасці кіраўнік дзяржавы адрасаваў ветэранам, якія ўносяць велізарны ўклад у ідэалагічную работу з маладымі супрацоўнікамі і фарміруюць прынцыповую грамадзянскую пазіцыю ў падрастаючага пакалення.
Аляксандр Лукашэнка пажадаў калектыву Акадэміі МУС і іх блізкім моцнага здароўя, сямейнага дабрабыту, міру і дабра, новых поспехаў у службе на карысць роднай Беларусі.-0-
