28 сакавіка 2025, 16:20

Лукашэнка паўторна адправіў на дапрацоўку праект указа аб кантрольна-нагляднай дзейнасці

28 сакавіка, Мінск /Кар. БЕЛТА/. Прэзідэнт Беларусі Аляксандр Лукашэнка паўторна адправіў на дапрацоўку праект указа аб кантрольна-нагляднай дзейнасці. Аб гэтым паведаміў журналістам старшыня Камітэта дзяржаўнага кантролю Васіль Герасімаў па выніках нарады ў кіраўніка дзяржавы, перадае карэспандэнт БЕЛТА.

Гэта пытанне ўжо абмяркоўвалася на ўзроўні Прэзідэнта на нарадзе ў маі мінулага года. Тады Аляксандр Лукашэнка даручыў дапрацаваць праект указа, каб дакумент быў зразумелы і зручны для выкарыстання. Ставілася таксама задача змяніць стыль і метады работы кантралюючых органаў, зрабіўшы акцэнт на павышэнні эфектыўнасці работы.

Аднак і на гэты раз прыйсці да адной роўніцы не атрымалася. Праект указа будзе дадаткова дапрацаваны па шэрагу пытанняў, якія былі ўзняты ў ходзе дыскусіі. Зацікаўленым дзяржорганам давядзецца знайсці кампраміс, перагледзець падыходы і выдаць дакумент належнай якасці.

"Праект указа быў дэталёва абмеркаваны з кіраўніком дзяржавы. Па ходу абмеркавання выявіліся пытанні, якія неабходна будзе дапрацаваць. Савет Міністраў, Генеральная пракуратура і Камітэт дзяржаўнага кантролю зоймуцца гэтай работай для таго, каб ужо выдаць належнай якасці дакумент", - расказаў Васіль Герасімаў.

Канкрэтныя тэрміны для дапрацоўкі дакумента, паводле яго слоў, не ўстанаўліваліся. Аднак зацягваць з гэтым пытаннем не збіраюцца, паколькі прыняты ў 2009 годзе ўказ нумар 510 "Аб удасканаленні кантрольнай (нагляднай) дзейнасці ў Рэспубліцы Беларусь" ужо ўсё ж такі ўстарэў, ды і сама сфера мае патрэбу ў пэўных карэкціроўках, прычым не толькі ў тэхнічных.

"Змянілася і сама сутнасць кантрольнай дзейнасці. Мы вялікі ўпор робім на папярэджанне і прафілактыку. І кіраўнік дзяржавы ставіць перад намі задачу, каб мы трымалі баланс: калі парушыў - безумоўна, будзеш адказваць і ніякіх выключэнняў у гэтым выпадку не будзе; калі нармальна працуеш - ніякіх прэтэнзій да цябе не будзе і мы не будзем абцяжарваць частымі наведваннямі", - растлумачыў старшыня КДК.

Васіль Герасімаў адзначыў, што з 2020 года колькасць праверачных мерапрыемстваў зменшылася ў два разы. "Гэта значыць кантроль становіцца больш якасным. Мы ідзём туды, дзе сапраўды ёсць праблемы", - дадаў ён.

У чым галоўныя навацыі праекта ўказа

Новы праект указаў - гэта вялікі комплексны дакумент, у якім аб'яднаны ўсе пытанні, што датычацца кантрольнай дзейнасці. Пры яго распрацоўцы ўлічваліся таксама прапановы мясцовых органаў улады, прадпрыемстваў, бізнес-колаў.

"Асноўныя элементы дакумента грунтуюцца на дзеючым указе па кантрольнай дзейнасці. Гэта і формы кантролю, і ўзроўні прыняцця рашэнняў, і працэдурныя моманты, парадкі правядзення праверак. Гэтыя меры сёння дастаткова эфектыўныя", - адзначыў міністр па падатках і зборах Дзмітрый Кійко.

Разам з тым урад палічыў патрэбным у некаторым сэнсе аптымізаваць кантрольную дзейнасць, узмацніць прафілактычную і растлумачальную работу і дадаткова абараніць правы правяраемых суб'ектаў.

Чаму дакумент зноў адпраўлены на дапрацоўку

Адным са спрэчных пытанняў у дакуменце аказалася норма аб тым, каб растлумачэнні дзяржаўных органаў рознага ўзроўню былі абавязковымі для кантралюючых органаў. КДК з такой прапановай не згадзіўся. "Аналіз, які быў намі праведзены, сведчыць аб тым, што нават у розных абласцях па-рознаму тлумачаць. Не кажучы аб тым, што адзін і той жа орган можа выдаваць растлумачэнні абсалютна рознага характару. Таму гэта будзем абмяркоўваць далей", - растлумачыў Васіль Герасімаў.

Наступны неадназначны момант датычыцца прапановы ўрада ўносіць у кнігу ўліку праверак запісы аб усіх наведваннях. У КДК лічаць, што гэта толькі створыць нязручнасці для бягучай дзейнасці службовых асоб, а кніга ўліку праверак ператворыцца ў журнал уліку наведвальнікаў.

"Калі, ўмоўна, губернатар едзе глядзець парадак на зямлі або пасяўную, то навошта яму ехаць у галаўны офіс гаспадаркі і запісвацца ў гэту кнігу? Гэта датычыцца і старшыні райвыканкама, і мяне як упаўнаважанага па Гродзенскай вобласці. Там, дзе гэта трэба (праверка або маніторынг), безумоўна, гэта павінна быць. Калі гэта ідзе па іншай лініі, напэўна, гэта будзе залішнім", - лічыць старшыня Камітэта дзяржкантролю.

Дзмітрый Кійко дадаў, што Прэзідэнт таксама даручыў вывучыць праект указа на прадмет яго адпаведнасці Канстытуцыі і іншым заканадаўчым актам. "Па выніках абмеркавання кіраўнік дзяржавы прапанаваў ураду і іншым кантралюючым органам (гэта і Камітэт дзяржаўнага кантролю, і Генеральная пракуратура) паспрабаваць знайсці кампрамісы, якія задаволілі б як выканаўчых органаў, так і суб'ектаў, на якіх гэтыя нормы будуць распаўсюджвацца", - рэзюмаваў міністр.

Ці будзе абноўлены праект указа зноў вынесены на разгляд Прэзідэнта, пакуль невядома. Калі па дакуменце не будзе рознагалоссяў, магчыма, ён будзе прыняты ў рабочым парадку.-0-