8 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе прааналізаваць тэндэнцыю на змяншэнне колькасці гандлёвых аб'ектаў у сельскай мясцовасці. Адпаведнае даручэнне ён даў сёння, прымаючы ўдзел у агульным сходзе прадстаўнікоў членаў Беларускага рэспубліканскага саюза спажывецкіх таварыстваў, перадае карэспандэнт БЕЛТА.
Кіраўнік дзяржавы адзначыў, што з гандлю, па сутнасці, пачалася гісторыя беларускай кааперацыі, калі яна стала размяркоўваць прадукты па картках згодна з устаноўленымі нормамі і цэнамі. "Ды і цяпер гандаль - галоўны ў вашай дзейнасці. Гэта сёння асноўная галіна Белкаапсаюза, якая займае амаль 20 працэнтаў усяго тавараабароту ў вёсцы. Менавіта вы абслугоўваеце маланаселеныя вёскі, дзе менш як 10 жыхароў. Такіх кропак на карце Беларусі каля 5 тыс. І для старых людзей, якія там жывуць, вашы магазіны, аўтакрамы, нарыхтоўчыя пункты - гэта ўжо цэнтр грамадска-палітычнага жыцця. А вы - галоўныя ідэолагі і прапагандысты", - звярнуў увагу беларускі лідар.
Таму, даручыў Аляксандр Лукашэнка, тэндэнцыя на змяншэнне колькасці гандлёвых аб'ектаў, асабліва ў сельскай мясцовасці, павінна быць сур'ёзна прааналізавана. Згодна з існуючымі данымі, у 2020 годзе ў параўнанні з 2019-м колькасць магазінаў скарацілася амаль на 300 адзінак, або на 5 працэнтаў, а перасовачных сродкаў развазнога і разноснага гандлю - на 2 працэнты.
Кіраўнік дзяржавы адзначыў, што на адной з апошніх нарад з урадам узнікла дыскусія аб правільнасці ўзбуйнення або аптымізацыі ў вёсцы шэрага аб'ектаў - аддзяленняў пошты і банкаў, арганізацый сувязі.
"Яшчэ раз паўтару сваю пазіцыю: жыццё не стаіць на месцы. Прыходзяць новыя тэхналогіі. У нас няпростая сітуацыя з бюджэтам, калі трэба лічыць і эканоміць кожную капейку. Гэта ў любой краіне так. Таму галоўнае - усе паслугі павінны быць даступны сельскаму жыхару ў тых жа аб'ёмах, што і ў горадзе, і іх якасць павінна пастаянна расці. А што рабіць з занятасцю вызваляемых банкаўскіх або паштовых работнікаў? Гэта непасрэдны абавязак старшынь райвыканкамаў, якія не заўсёды хочуць займацца гэтай справай", - заўважыў Прэзідэнт.-0-
